QR Premer-Ministriniń birinshi orynbasary Álihan Smaiylov nesielik sharttar men qarjylandyrýǵa qoljetimdilikti arttyrý sharalaryna qatysty depýtattardyń saýalyna jaýap berdi, dep habarlaidy "Ult aqparat".
«Kásipkerlerge «Biznestiń jol kartasy-2025» jáne «Qarapaiym zattar ekonomikasy» baǵdarlamalary boiynsha qaryzǵa qarajat túpkilikti 6%-ben beriledi. «Biznestiń jol kartasy-2025» baǵdarlamasy boiynsha beriletin nesie somasy 7 milliard teńgege deiin ulǵaityldy. Sýbsidiialaý merzimi - 5 jyl.
«Qarapaiym zattar ekonomikasy» baǵdarlamasy boiynsha nesie somasy shektelmeidi. Al sýbsidiialaý merzimi - 10 jyl. Kepildik quraldary da jaqsartylǵan. «Biznestiń jol kartasy-2025» boiynsha kepildik - nesie somasynyń 85%-yn quraýy múmkin. «Qarapaiym zattar ekonomikasy» boiynsha kepildik nesie somasynyń 50%-yn quraidy. «Biznestiń jol kartasy 2025» baǵdarlamasynan salalyq shekteýler alynyp tastaldy. Bul shaǵyn jáne orta bizneske, qyzmet túrine qaramastan, baǵdarlamanyń qatysýshysy bolýǵa jáne jeńildetilgen qarjylandyrýǵa múmkindik beredi. Taýarlar men qyzmetterdiń tizimi «Qarapaiym zattar ekonomikasy» baǵdarlamasy aiasynda aitarlyqtai keńeitildi», - delingen Álihan Smaiylov depýtattardyń saýalyna bergen jaýabynda.
Ol osy baǵdarlama boiynsha nesielendirýdiń jalpy kólemi 1 trln teńgege deiin ulǵaitylǵanyn eske saldy.
«Sonymen qatar, Ulttyq bank salalyq shekteýsiz, onyń ishinde jeke kásipkerler úshin shaǵyn jáne orta biznesti jeńildetilgen nesieleý baǵdarlamasyn iske qosty. Nesieler ainalym qarajatyn tolyqtyrý úshin 1 jylǵa 8%-ben beriledi. Bul baǵdarlamaǵa 600 milliard teńge bólingen. Jalpy, nesie berý sharalaryn arttyrý úshin kóptegen shekteý alynyp tastaldy, tetikter jeńildetildi. «Biznestiń jol kartasy-2025» baǵdarlamasy aiasynda Memleket basshysynyń tapsyrmasy boiynsha jańa baǵyt - mikro jáne shaǵyn bizneske shaǵyn nesie berile bastady. Biznestiń osy sanaty úshin sýbsidiialar arqyly nesieler 6% mólsherlememen beriledi. Nesieler ainalym qarajatyn tolyqtyrýǵa 5 million teńgege deiin, óndiristik qajettilikke 20 million teńgege deiin bólinedi», - dedi vitse-premer.
Sonymen qatar, ol qyzmet túrlerine eshqandai shekteýdiń joqtyǵyn basa aitty.
