Qairat Qudaibergen biznesmenmen birge sý tasqynynan zardap shekken aqtóbelik 10 jastaǵy qyzǵa baspana syilamaqshy, - dep habarlaidy "Diapazon".
"Zardap shekken qyzǵa úi salyp berýdi josparladyq, biraq keiinnen jaqsy eki qabatty úi alyp berýdi sheshtik, - dep keltiredi kásipkerdiń sózin basylym. - Biz úlken ári ádemi, 159 sharshy metr aýmaqty qamtityn úidi qarastyrdyq. Ony satyp alyp, Mahabbattyń otbasyna syilaǵymyz keldi. Úige jihazdardy, kir jýǵysh mashinany, teledidar men basqa da tehnikany apardyq. Biraq Aqtóbe ákimdigindegiler sol aýmaqtaǵy jer ýchaskesinde turýǵa bolmaitynyn, iaǵni, úi ózenge tym jaqyn ornalasqandyqtan bas tartyp otyr. Alaida úi biik jáne ol ózennen alys ornalasqan. Endi basqa úi izdep jatyrmyz. Osy isti sońyna deiin tyndyryp, qyzǵa baspana syilamaqshymyz".
"Ákimdikten osy máselege qatysty qandai da bir túsinik alý múmkin bolmady. Qazirgi ýaqytta Mahabbat Eshimova sý tasqynynan zardap shekken basqa adamdar siiaqty jaldamaly páterde turyp jatyr", - deidi basylym.
Al Qairat Qudaibergen Tengrinews.kz tilshisine jańa baspanaǵa jumsalatyn aqshanyń úlken bóligin kásipkerdiń bólgenin jáne onyń óz esimin kórsetpeýin suraǵanyn naqtylady.
Sondai-aq, Qazaqstannyń eńbek sińirgen ártisi Merýert Túsipbaeva da sý tasqynynan zardap shekkenderge kómektesýge daiyn eken. Ánshi "Diapazon" basylymyna 1 mamyrda Aqtóbege ushyp kelip, onda zardap shekkenderge tegin kontsert beretinin aitqan.
Eske sala keteiik, osyǵan deiin sý tasqynynan zardap shekken Eshimovtar otbasy jaily habar taraǵan edi. Sheshesi Turǵangúl Eshimovanyń aitýynsha, kúieýiniń júregi álsiz jáne ol úiiniń qirap qalǵanyn áli kórmepti. Áieldiń kenje qyzy Mahabbat № 36 mektebiniń tórtinshi synyp oqýshysy eken. Ol mektep formasynan, oqýlyqtarynan da aiyrylyp, tabiǵi apattan eseńgirep qalǵan.
"Barlyq kitabym úide qalyp qoidy. Joǵaldy. Bilik qaida qarap otyr. Kitabymdy qaitarǵan joq. Ákem kezekte jyldap turady, ne paidasy bar? Barlyq zatymyz sonda qalyp qoidy. Oqýyma alańdadym, endi úiimizden de aiyrylyp qaldyq. Nege biz munda turýymyz kerek deisizder? Eńbegimizben salǵan úiimiz edi", - degen edi qyz videoda.
Qazirgi ýaqytta Aqtóbede sý tasqynynan zardap shekkenderge kómek kórsetýge arnalǵan komissiia qurylǵan. Materialdyq kómek kórsetkisi keletinder "Qolǵanat Aqtóbe" qoǵamdyq qorynyń esebine qarajat aýdara alady.
KIWI ámiian: +77058202666 BIN 170240000585 IIK KZ 819260101193016000 "Kazkommertsbank" AQ-da BIK KZKOKZKX.
