Foto: esphr.co.uk
Senat depýtattary qosylǵan qun salyǵyn 12%-dan 16%-ǵa deiin kóterý máselesin otandyq kásipkerlermen egjei-tegjei talqylaýdy usyndy, dep habarlaidy Sputnik Qazaqstan.
Senator Lázzat Rysbekovanyń aitýynsha, shaǵyn jáne orta kásipkerlikke qatysty salyq saiasaty jetildirilmegen. Qazirgi tańda biznes qaýymdastyqtyń dál osyǵan qatysty shaǵymy kóp. Eń aldymen, bul qosylǵan qun salyǵyna qatysty.
"Dálirek aitqanda, qosylǵan qun salyǵy stavkasyn 12-dan 16%-ǵa deiin kóterý týraly usynys. Qosylǵan qun salyǵyn kóterý máselesin egjei-tegjei pysyqtap, otandyq kásipkerlermen talqylaý qajet dep sanaimyz", - dedi Rysbekova senatta ótip jatqan shaǵyn jáne orta kásipkerlikti damytý taqyrybyna arnalǵan úkimet saǵatynda.
Sondai-aq, senat depýtattarynyń pikirinshe, úkimet bizneske salyq júktemesin ósirmeitin, aýyrtpalyq alyp kelmeitin balamaly nusqalardy qarastyrýy qajet. Buǵan qosa, qosylǵan qun salyǵyn qaitarý, jumys berýshilerge salyqtar men áleýmettik tólemder boiynsha joǵary júktemeniń saqtalýy siiaqty problemalar sheshýdi talap etedi.
"Salyq saiasatynda biznes pen memleket múddesiniń teńgerimi qajet. Salyq sharalary shaǵyn biznesti irilendirýge yntalandyrýǵa tiis. Al qazir, ókinishke qarai, bári kerisinshe. Kásipkerlik sýbektileriniń usaqtalýy baiqalady, iaǵni shaǵyn kásiporyndar sany aitarlyqtai ósip jatyr", - dedi depýtat.
Kásipkerlerdiń pikirinshe, teris úrdiske áser etip otyrǵan sebepterdiń 80%-y qoldanystaǵy salyq salý júiesimen bailanysty. Al qalǵan 20%-y memlekettik qoldaý sharalarymen bailanysty, olardyń kóbi shaǵyn bizneske baǵyttalǵan.
Aita keteri, ulttyq ekonomika ministrligi jańa Salyq kodeksi aiasynda 2025 jyldan bastap qosylǵan qun salyǵyn 12 protsentten 16%-ǵa deiin kóterýdi usyndy. Sonyń arqasynda biýdjetke qosymsha 2-2,4 trln teńge túsedi degen jospar bar.
Alaida "Atameken" kásipkerler palatasy bul bastamaǵa qarsy. Biznesmenderdiń pikirinshe, salyq stavkasy ósse taýarlar men qyzmetter qymbattaidy, halyqtyń satyp alý qabileti men tutynýshylyq suranys tómendeidi.
