2017 jyldyń qyrkúieginde kásipker Almaty oblysy Jambyl aýdanynyń ákimine jer ýchaskesiniń nysanaly maqsatyn ózgertý boiynsha ótinish bergen. Alaida jergilikti atqarýshy organ Jer kodeksiniń 97 baby 3-tarmaǵyna silteme jasap, azamattyń aryzyn qabyldamai tastaidy.
Kásipker Óńirlik kásipkerler palatasyna júgingennen keiin Memlekettik qyzmet isteri jáne sybailas jemqorlyqqa qarsy is-qimyl agenttigininiń departamentine jer qatynastary bóliminiń qyzmetine tekserý júrgizý jóninde hat joldandy.
Memlekettik qyzmet isteri jáne sybailas jemqorlyqqa qarsy is-qimyl agenttigi oblystyq departamentiniń aqparatynsha, memlekettik qyzmetti negizsiz túrde kórsetpeý jaǵdaiy anyqtalmaǵan. Alaida Almaty oblysy Jambyl aýdanynyń jer qatynastary bólimi men ákimdik apparatynyń qyzmetkerleri tarapynan memlekettik qyzmet kórsetý protsedýrasynda buzýshylyq faktisi oryn alǵan.
«Jer ýchaskesiniń nysanaly maqsatyn ózgertý boiynsha sheshimdi berý» memlekettik qyzmetin kórsetý nátijesi boiynsha buzýshylyq faktisi anyqtaldy. Memlekettik qyzmet standartynyń 3-tarmaǵy boiynsha memlekettik qyzmet oblystardyń, Astana jáne Almaty qalalarynyń, oblystyq mańyzy bar aýdandar men qalalardyń atqarýshy organdarymen, aýdandyq mańyzy bar qalalardyń, poselkelerdiń, aýyldardyń, aýyldyq okrýgterdiń ákimderimen kórsetiledi. Qujattardy qabyldaý jáne memlekettik qyzmettiń nátijelerin berý qyzmet kórsetýshiniń keńsesi, iaǵni jergilikti atqarýshy organ arqyly júzege asyrylady», - delingen memlekettik organ jaýabynda.
Kásipkerler palatasynyń Kásipkerlerdiń quqyǵyn qorǵaý jáne ákimshilik kedergilerdi azaitý jónindegi bólimniń sarapshysy Dýman Kerimbaevtyń sózinshe ákim atyna jazylǵan ótinishke jer qatynastary bóliminen jaýap qaitarylǵan. Jer kodeksiniń talaptary boiynsha ýchaskeniń nysanaly maqsatyn ózgertý boiynsha teris nemese oń sheshim shyǵarý boiynsha jaýap jergilikti atqarýshy organ, iaǵni ákim tarapynan berilýi tiis.
Atalǵan sebepter boiynsha ótken jyldyń 7 qarashasynda Jambyl aýdany ákiminiń ókimimen jumysta jiberilgen kemshilikter boiynsha jer qatynastary bóliminiń basshysyna jáne ákim apparatynyń bas mamanyna sógis jariialandy.
