Nur-Sultan qalalyq bilim basqarmasynyń basshysy Sholpan Qadyrova oqýshylardyń oqý jetistikteri qalai baǵalanatynyn túsindirdi, dep habarlaidy QazAqparat.
«Qashyqtan oqytý kezindegi mańyzdy máseleniń biri - oqýshylardyń oqý jetistikterin baǵalaý. Ózderińiz biletindei, baǵalaý bilimdegi olqylyqtardy anyqtap, oqýshylardyń oqýǵa degen yntasyn arttyrady. Sondai-aq, muǵalim men oqýshy sabaqtaǵy jetistikterin jaqsartý úshin qosymsha is-sharalar josparyn birlesip jasai alady. Biylǵy oqý jylyndaǵy karantin jaǵdaiynda 2-11 synyp oqýshylarynyń oqý jetistikteri qalyptastyrýshy baǵalaý arqyly anyqtalyp, ball qoiylady. Al 1-synypta baǵalaý júrgizilmeidi. Qalyptastyrýshy baǵalaý oqýshylardyń jetistikterin baqylaý jáne sabaqta saralanǵan jumysty odan ári qurý úshin júrgiziletinin taǵy da eske salǵym keledi», - dedi ol.
Basqarma basshysy birinshi toqsan aiaqtalýǵa jaqyn qalǵanyn atap ótti.
«Osyǵan bailanysty, oqýshylardy oqylǵan bólim úshin jiyntyq baǵalaý 5 qazannan bastaldy, al toqsan úshin baǵalaý 28 qazannan bastalady. Baǵalanatyn ár pán boiynsha – 1 bólim boiynsha jiyntyq baǵalaý jáne 1 toqsan boiynsha jiyntyq baǵalaý júrgiziledi. Oqýshylardyń oqý jetistikterin baǵalaý júrgiziletin pánder mekteptiń oqý jumys josparyna sáikes aiqyndalady. Sonymen qatar, jiyntyq baǵalaý kelesi oqý pánderi boiynsha ótkizilmeidi: «Ózin-ózi taný», «Kórkem eńbek», «Mýzyka», «Dene shynyqtyrý», «kásipkerlik jáne biznes negizderi», «Grafika jáne jobalaý», «Qoǵam jáne din», «Bastapqy áskeri jáne tehnologiialyq daiyndyq» jáne «Bastaýysh synyptarǵa arnalǵan informatika». Atap ótetin jaǵdai, meditsinalyq kórsetkishter boiynsha erekshe bilim qajettiligi bar úide oqityn balalar úshin muǵalim oqý júktemesi men oqyǵan oqý materialyn eskere otyryp, jeke tapsyrma ázirleidi», - dedi Sholpan Qadyrova.
Onyń aitýynsha, toqsandyq qortyndy baǵa – qalyptastyrýshy baǵalaý, bólim boiynsha baǵalaý jáne toqsan boiynsha baǵalaý nátijeleri negizinde, iaǵni oqýshylardyń toqsan ishindegi oqý jetistikterin baǵalaý kezinde eskerilip, baldar qoiylady.
Jiyntyq baǵalaýdyń qorytyndylary oqýshylarǵa, ata-analarǵa qaǵaz nemese elektrondyq formatta beriledi. Qalyptastyrýshy baǵalaý kezinde muǵalim kún saiyn jýrnalda oqýshylardyń oqý jetistikteriniń progresin Kúndelik elektrondy jýrnalynda ornalastyrylǵan esepke sáikes ball túrinde tirkep otyrady.
Qalyptastyrýshy baǵalaý úshin eń joǵary ball 10 baldan aspaidy. Bul rette 1-3 ball tómen deńgei ólshemderine sáikes keledi (10% - dan 30% - ǵa deiin). Osyndai baǵalaý oqýshy bul jaǵdaida qatelikter jiberip, muǵalimmen keri bailanys týraly qorytyndy jasamaidy, tapsyrmalardy óz betinshe oryndai almaǵan jaǵdaida qoiylady.
Al 4-7 ball aralyǵy - orta deńgei ólshemderine sáikes keledi (40%-dan 70% - ǵa deiin). Bul baǵalaý oqýshy qandai da bir qatelikter jiberýi múmkin, tapsyrmalardy keide óz betinshe oryndaýǵa qiyndyqtar týyndaǵanda qoiylady. 8-10 ball - joǵary deńgei (80% - dan 100% - ǵa deiin).
Bul jaǵdaida oqýshy tapsyrmalardy oryndaý kezinde shamaly dálsizdikter jasaýy múmkin, óz betinshe tapsyrmalardy oryndai alady, túsindire alady, jáne jaýaptaryn negizdei alady.
«Osylaisha, toqsandyq baǵalaý – qalyptastyrýshy baǵalaýdyń ortasha bally, bólim boiynsha jáne toqsan boiynsha jiyntyq baǵalaýdyń nátijeleri negizinde tiisinshe 25, 25 jáne 50 paiyzdyq araqatynasta qoiylady. Osyǵan bailanysty oqýshylardyń ata-analary tarapynan oqytý nátijelerin baǵalaýdyń obektivtiligi boiynsha birneshe suraqtar kelip túskenin atap ótkim keledi. Sondyqtan, osy siiaqty máseleler týyndaǵan jaǵdaida, toqsan úshin jiyntyq baǵalaý qoiylǵanǵa deiin bir kúnnen keshiktirmei moderatsiia júrgiziletinin esterińizge salamyn», - dedi basqarma basshysy.
