Qashyqtan oqytý kezinde muǵalimderden eseptilik suraý qarastyrylmaidy. QR Bilim jáne ǵylym vitse-ministri Sholpan Karinova onlain brifingide osylai málim etti, dep habarlaidy QazAqparat.
«Qaibir jaǵdaida da ár muǵalim ózi úshin formattardyń birneshe túri bar ekendigin bilýi kerek. Biz barlyq oqýshyny oqýmen qamtýǵa tiistimiz. Negizgi ustanymdardy muǵalimder biledi, iaǵni kúndelikti josparlarynda oqýdyń mazmuny, kólemi men beriletin materialdardan habardar. Osy materialdar balaǵa jetkizilýi tiis», - dedi vitse-ministr.
Onyń sózine qaraǵanda, tiisti buiyryqta kórsetilgendei, osy tórtinshi toqsannyń ishinde ár pán boiynsha tek bir jiyntyq baǵalaý jumysy bolady jáne toqsandyq baǵalaý júiesi qamtylady.
«Osy qalyptastyrýshy baǵalaý júiesinde oqýshylarmen keri bailanystyń arqasynda muǵalim ár oqýshynyń sabaqty meńgergen deigeiin óz úshin baqylap otyrady. Osy úsh formatty paidalanǵan jaǵdaida da birinshi kezekte muǵalimderdiń eskeretindigi – ol barlyq sharalar pedagogtyń óziniń shyǵarmashylyq sheshimderine balanysty bolady. Qashyqtan oqytý kezinde eshbir kúshteý nemese eseptilik suraý qarastyrylmaidy. Bul turǵyda muǵalimder yńǵaily ári ikemdi sabaq kestesi boiynsha jumys isteidi. Osynyń aiasynda ustazdar sabaqtyń mazmunyn, pánniń tolyqqandy kólemin berýge tiisti», - dedi Sholpan Karinova.
Budan buryn habarlanǵandai, qashyqtan oqytý aiasynda mektep oqýshylaryna arnalǵan telesabaqtardyń kestesi 5 sáýirge deiingi aralyqta beriledi.
Sonymen qatar Qazaqstanda mektep oqýshylarynyń sabaǵy jaz ailaryna shegerilmeitini aityldy.
