Qazaqstandaǵy salyq aptalyǵy teńgeniń nyǵaiýyna áser etti, dep habarlaidy QazAqparat.
Onlain-brifing barysynda Qazaqstan qor birjasynyń (KASE) tóraiymy Alina Aldambergen teńgeniń dollarǵa qatysty qalai nyǵaiyp jatqanyn aitty, sondai-aq ulttyq valiýtanyń bolashaǵyna boljam jasady.
«Jyl basynan beri teńge 10,5% quldyrady. Biraq qazir biz teńgeniń nyǵaiyp jatqanyn kórip otyrmyz. Bul salyq aptalyǵymen bailanysty. Dollarmen qamtamasyz etý artyp keledi. Ulttyq valiýta rýblge qatysty 6,8% nyǵaidy», - dedi Alina Aldambergen.
Onyń aitýynsha, naýryzda teńge baǵasynyń arzandaýy dúniejúzindegi belgisizdik pen ekonomikalyq jaǵdaiǵa bailanysty boldy.
«Bul karantin jáne ekonomikalyq belsendiliktiń tómendeýine bailanysty boldy, qoldaý sharalary qabyldandy. Ulttyq kompaniialar tartyldy, olar tabystyń bóligin valiýta naryǵynda iske asyryp jatyr. Odan ári Ulttyq bank te naýryzdaǵydai naryqtyń turaqty bolýyna kómektese alady. Ulttyq qordan transfer ulǵaidy», - deidi Qazaqstan qor birjasynyń (KASE) tóraiymy Alina Aldambergen.
Óz kezeginde, KASE taldaý bóliminiń meńgerýshisi Tamara Shadieva teńgeniń nyǵaiýyna álemdik ekonomikanyń qalpyna kele bastaýy jáne kóptegen elderdegi karantindik sharalardyń joiylýy áser etkenin atap ótti.
«Sondai-aq, salyqtyq tólemder túrinde jergilikti qoldaýdyń mańyzdy faktory boldy, óitkeni bizdiń ulttyq eksporttaýshy kompaniialar 2020 jyldyń birinshi toqsanynda shetel valiýtasyndaǵy túsimderdi salyq tólemderine aiyrbastady. Salyqtardy tóleý 25 mamyrda aiaqtalýy kerek. Valiýtalyq naryqta jaǵdai turaqty, sondyqtan teńge nyǵaia bermek», – deidi ol.
