Biyl elimizde qarjy piramidasyn qurýǵa qatysty 35 fakti tirkeldi, dep habarlady "Ult aqparat".
Qarjy ministrliginiń Qarjy monitoringi komitetiniń málimetinshe, BQO-da zardap shekkenderdiń 612 mln teńgeden astam qarajatyn qarjy piramidasy jinaǵan. Zańsyz qyzmetti uiymdastyrǵan «R.O.I. Club» JShS qyzmetkerlerine qatysty qylmystyq isti tergelip jatyr.
Bes oblysta quny 15 myń teńge nemese odan qymbat «sertifikatty» satý arqyly halyqtan aqsha jinaý shemasyn jasap, iske asyrǵan «B2B Jewelry» zergerlik buiymdar dúkenderiniń basshylaryna qatysty is boiynsha Almatyda tergeý júrgizilip jatyr. Osy ýaqytqa deiin 10 myńnan astam zardap shekken adam anyqtalǵan. 250 million teńgeden astam shyǵyn keltirildi.
Komitet mamandary qarjylyq piramidany qalai anyqtaýǵa bolatynyn aityp, QR Qylmystyq kodeksiniń 217-babyna sáikes qarjy (investitsiia) piramidasyn qurý jáne basqarýǵa qylmystyq jaýapkershilik qarastyrylǵanyn atap ótti.
Aita ketý kerek, qarjy piramidasyna qosylý erikti túrde jáne zańdy qoldaýsyz júzege asady. Bul degenimiz, eshkim investitsiianyń qaitarylýyna kepildik bermeidi.
Sonymen, Qarjy piramidasynyń belgileri qandai?
Adam sengisiz paida, ústeme tabys ýáde etiledi. Joǵary tabys keletini jóninde ýáde tek bir ret uiymǵa tartý kezinde oryndalýy múmkin, biraq ary qarai odan da kóp qarajattan aiyrylyp qalý qaýpi óte joǵary.
Kompaniia shynaiy ekonomikalyq nemese investitsiialyq qyzmetpen ainalyspaidy. Piramida ózin taýar, nesie, týristtik, qurylys kompaniiasy retinde ózin tanystyrady. Alaida, shyndap kelgende eski salymshynyń barlyq tólemi jańa salymshylardyń jarnasy esebinen tólenedi.
Jobalardyń materialdyq-quqyqtyq bazasy joq, iaǵni, bul kompaniialar jańadan qurylǵan, qarjylyq eseptilikke ie emes, kelisim jasamaidy nemese kelisimder tek uiymdastyrýshylardyń paidasyna kózdep jasalǵan ári Qazaqstan zańnamasyna sáikes kelmeidi.
Kompaniianyń qyzmeti tym jan-jaqty, sol arqyly kompaniia aiqyn ári naqty qyzmetiniń joqtyǵyn jasyrady.
Áleýmettik jelidegi belsendi ári mezi qylatyn jarnamasy bolady. Osyndai jarnamany taratý «Jarnama týraly» zańǵa sáikes emes bolǵandyqtan, atalmysh zańsyz biznestiń barlyǵy áleýmettik jeli men messendjerde keńinen taralady.
Qarjy regýliatory litsenziiasynyń bolmaýy. Kez kelgen salym eger syiaqynyń merzimi men mólsherlemesi kórsetilgen bolsa depozit bolyp sanalady. Halyqtan salym alý úshin QR Ulttyq bankiniń litsenziiasy qajet, jáne ol ekinshi deńgeidegi bankterde bar. «QR ekinshi deńgeidegi bankterinde ornalastyrylǵan depozitterge mindetti kepildik berý týraly» QR Zańyna sáikes bankter halyqpen jumys jasap, salynǵan qarajattyń qaita berilýine kepildeme beredi. Biraq qarjy piramidasynyń uiymdastyrýshylary litsenziiany qajet etpeitindigin málimdeidi.
«Eger sizde qarjy piramidasynyń qyzmetine qatysty bolýyńyz jaily kúmánińiz bolsa, Komitetke kelesi senim telefondary arqyly habarlasýdy suraimyz: 8 (7172) 708-478, 8 (7172) 709-920», delingen habarlamada.
