QR Qarjy ministrligi elge azyq-túlik kirgizý sharalaryn barynsha jeńildetti, dep habarlaidy "Ult aqparat" Memlekettik kirister komitetiniń baspasóz qyzmetine silteme jasap.
«Elimizge importtalatyn azyq-túlikterdi jetkizý úshin «jasyl dáliz» jumys isteýde. Kedendik kedergiler joiylyp, tekserister men taýarlardyń qunyn baqylaý rásimderi alynyp tastaldy.
Sondai-aq, 2020 jyldyń 22 naýryzynan bastap QR Úkimetimen jekelegen taýarlardy (qaraqumyq, un, qant, kartop, sábiz, shomyr, qyzylsha, piiaz, oramjapyraq, kúnbaǵys dáni, kúnbaǵys maiy) Qazaqstannan shyǵarýǵa tyiym salyndy. QR QM Memlekettik kirister komiteti bul taýarlarǵa eksporttyq kedendik baqylaýdy kúsheitip, «ASTANA-1» elektrondy deklaratsiialaýdyń aqparattyq júiesinde olardy eksporttaýǵa tyiym saldy (Bul tyiym EAEO elderine taratylmaidy)», delingen habarlamada.
QR Qarjy ministrligi, QR UQK Shekara qyzmeti jáne QR Densaýlyq saqtaý ministrliginiń birlesken sheshimi boiynsha ádettegi júie boiynsha jumys isteitin júk ótkizý beketteri belgilendi (qalǵan beketterdiń jumysy tótenshe jaǵdaiǵa bailanysty 2020 jyldyń 16 naýryzynan bastap ýaqytsha toqtatyldy).
Osylaisha, Qytai Halyq Respýblikasy men Qazaqstan arasynda «Nurly jol» jáne «Dostyq» ótkizý beketteri (avtokólikter úshin) jumys isteýde.
Ózbekstan men Qazaqstan arasynda: «Qazyǵurt», «Qaplanbek», №B.Qonysbaev», «Atameken», «Tájen» beketteri.
Túrkimenstan men Qazaqstan arasynda: «Temir baba» beketi.
Resei Federatsiiasy men Qazaqstan arasynda «Qairaq», «Jańa jol», «Qaraqoǵa», «Sharbaqty», «Úrlitóbe», «Qosaq», «Aýyl», «Úbi», «Jaisań», «Álimbet», «Syrym», «Qurmanǵazy», «Tasqala», «Jánibek» beketteri jumys isteýde.
Barlyq halyqaralyq shekara beketterindegi ótkizý pýnktterinde sanitarly-karantindik baqylaý kúsheitilgen. Atap aitqanda: sanitarlyq-epidemiologiialyq qyzmet jumysshylary jumyldyrylǵan, ótkizý beketteri jylý sezgish quraldar jáne pirometrlermen jaraqtandyrylǵan, naýqas adamdar anyqtalǵan jaǵdaida, olardy ýaqytsha oqshaýlaýǵa arnalǵan em-sharalyq bólmeler qarastyrylǵan.
