QR Parlamenti Májilisinde Úkimettiń 2016 jylǵa respýblikalyq biýdjettiń atqarylýy týraly esebin tanystyrý barysynda Qarjy ministri Baqyt Sultanov zeinetaqyny arttyrýǵa qansha qarjy bólingendigin málimdedi, dep habarlaidy Ult.kz tilshisi QazAqparat agenttigine silteme jasap.
«Bekitilgen biýdjettiń shyǵystary eki ret naqtylanýdyń nátijesinde 980 mlrd teńgege kóbeigen bolatyn. Biýdjettiń osyndai ulǵaiýy, birinshiden, áleýmettik salaǵa qarjyny kóbeitýge múmkindik berdi. Shyǵystardyń jartysy, iaǵni 4 trln teńgesi áleýmettik bolyp tabylady», - dedi ministr.
Atap aitqanda, 1 qańtardan bastap zeinetaqy mólsheri 9 paiyzǵa kóbeidi.
«Zeinetaqyny tóleýge biýdjetten 1 353 mlrd teńge qarjy bólindi.
Azamattyq qyzmetkerlerdiń jańa eńbekaqy júiesi modelin engizýge 290 mlrd teńge bólindi. Bala týýǵa járdemaqy 438 myń alýshyǵa tólenip, oǵan 33 mlrd teńge jumsaldy», - dedi Sultanov.
