Pavlodar oblysynyń ákimi sybailas jemqorlyqqa qarsy is-qimyl jónindegi óńirlik komissiianyń otyrysy kezinde óziniń qaramaǵyndaǵy qyzmetkerlerdi jurtshylyqpen belsendi yntymaqtasýǵa jáne problemalardy talqylaýǵa shaqyrdy, dep habarlaidy Ravlodarnews.kz saity.
Aýyl sharýashylyǵy basqarmasynyń jumysyndaǵy sybailas jemqorlyqtyń aldyn alý sharalary týraly vedomstvo basshysy Serik Batyrǵojinov málim etti.
Onyń aitýynsha, agroónerkásiptik keshen salasynda sýbsidiia berý úshin qoldanylatyn «Qolday» júiesiniń qoldanýshylary tarapynan suraqtar kóptep týyndaidy. Osy máseleni sheshý úshin sybailas jemqorlyqqa qarsy qyzmet ókilderi fermerlerdiń kez kelgen suraǵyna jaýap beretin front-keńse ashý kerek dep esepteidi.
- AÓK-de tsifrlyq júie óte qajet. Bizde qansha egis alqaby, qansha mal basy, qandai sýbsidiialar tólenedi - osy derekterdiń barlyǵy bir jerde jinalýy tiis. Turǵyndar aldynda ashyq bolý kerek jáne ár isti ashyq júrgizý kerek. Sonymen qatar, bul málimetterdiń bazalary basqalarmen biriktirilýi kerek. Sonda ǵana aýyl sharýashylyǵyna investitsiialar túsedi, - dep atap ótti óńir basshysy Ábilqaiyr Sqaqov.
Pavlodar oblysynyń meditsinalyq mekemeleriniń qyzmetin de ashyq etý usynyldy. «Ertis-adaldyq alany» jobalyq keńsesi ókilderiniń pikirinshe, bul úshin jurtshylyqty aýrýhanalardaǵy baqylaý keńesterine qosý qajet.
- Búginde «Memlekettik múlik týraly» zańy boiynsha memleket qatysatyn kásiporyndar janynan qurylatyn baiqaý keńesteri ashylyp, jabyq rejimde jumys istep jatyr. Bul keńesterdiń quramynda kim bar? Quramdardy oblystyq densaýlyq saqtaý basqarmasy tek ishki buiryqtarmen bekitti me? Jyl qorytyndysy boiynsha quram syiaqy aldy ma jáne qandai? Keńes múshelerin taǵaiyndaýdyń adal tetigin bylai jasaýǵa bolady: BAQ-ta kandidattardy irikteý týraly habarlandyrý jariialaý kerek, al konkýrs ótkizilgennen keiin oblystyq densaýlyq saqtaý basqarmasy baiqaý keńesin quratyn bolady, - dedi jobalyq keńseniń basshysy Rizabek Isabekov.
Oblys ákimi barlyq memlekettik organdar azamattyq qoǵam ókilderimen yntymaqtastyqta jumys isteýi tiis ekenin eskertti.
- Qoǵam aldynda týyndaityn problemalardy ashyq kóterý qajet. Men basshylardy olardyń jabyq bolǵany úshin birneshe ret synǵa alǵan edim. Jergilikti oryndardaǵy ákimder men oblystyq basqarmalardyń basshylary óz jumystaryn jurtshylyqpen belsendi talqylaýy tiis. Muny jasamaityndardy qolǵa alatyn bolamyz, - dedi Ábilqaiyr Sqaqov.
Sybailas jemqorlyqqa qarsy is-qimyl komissiiasynyń otyrysynda ekonomikalyq tergeý departamentiniń basshysy Arman Júnisov biýdjet qarajatyn jymqyrý shemalary jaily aitty. Osyndai shemalardyń biri boiynsha Pavlodardyń turǵyny qurylys-montajdaý jumystaryn júrgizýge litsenziiasy bar 8 kompaniiany satyp alyp, bógde adamdarǵa qaita tirkegen.
- Osyndai JShS-niń altaýy eshqandai aktivteri bolmai, jalpy quny 1,2 milliard teńge bolatyn tender arqyly 56 memlekettik tapsyrysqa ie bolǵan. Tapsyrys berýshi kórsetilgen 8 kompaniianyń sońǵy 5 jylda bar bolǵany 14 million teńge salyq tólegenine nazar aýdarmaǵan. Budan bólek, Pavlodar qalasynyń turǵyny bes turǵyn úidi abattandyrýǵa jáne sport nysanyn salýǵa bólingen 102 million teńgeden astam qarajat urlady degen kúdikpen qamaýda otyr. Qylmystyq is sotqa joldandy, - dep málim etti Arman Júnisov.
Ábilqaiyr Sqaqov búginde Pavlodar oblysynyń qurylys salasynda birqatar máseleler, sonyń ishinde sapasyz tehnikalyq tapsyrmalarǵa bailanysty túitkilder bar ekenin aitty.
- Kóleńkeli ekonomikaǵa keletin bolsaq, búginde qarjy aǵyndarynyń 30% - ǵa jýyǵy jasyryn qalyp otyr. Respýblikalyq deńgeide kóleńkeli ekonomikaǵa qarsy is-qimyl týraly zań jobasy ázirlenetin bolady. Bizge óńir ishinde qandai salalar, qandai biýdjettik baǵdarlamalar ákimshileri jáne qandai merdigerlik uiymdar osy táýekelge kóbirek ushyraityny jóninde óz taldaýymyzdy jasaýymyz qajet, - dedi ákim.
Óńir basshysy kóleńkeli ekonomikanyń deńgeii neǵurlym tómen bolsa, investitsiialyq tartymdylyq soǵurlym joǵary bolatynyn eske saldy.
- Sondyqtan salyq tóleýden jaltarýǵa, aqshany jylystatýǵa jáne sybailas jemqorlyqqa qarsy kúres - ortaq mindet, - dep atap ótti Ábilqaiyr Sqaqov.
