Qazaqstan Prezidentiniń keńesshisi Erlan Qarin Ulttyq qoǵamdyq senim keńesindegi rotatsiiaǵa túsinikteme berdi, dep habarlaidy "Ult aqparat".
«Buǵan deiin málimdegendei, Ulttyq keńestiń qyzmetine qoǵam belsendilerin tartý maqsatynda UQSK quramy merzimdi túrde rotatsiia júrgizip otyrady. Ulttyq keńeske jalpy kún tártibin jańartyp, jańa taqyryptar men usynystar aitatyn jańa belsendiler men sarapshylar kelýi kerek. Ulttyq keńestiń ereksheligi de osynda – bul syndarly pikirtalastar ótetin jandy jáne belsendi ziiatkerlik alań», – dep jazdy Erlan Qarin Telegram-daǵy óz akkaýntynda.
«Osyǵan bailanysty Ulttyq keńestiń quramyna jańa qoǵam qairatkerleri men sarapshylar engizildi. Atap aitqanda, Ulttyq keńeske «Dos» táýelsiz ómir ortalyǵy» múgedekter qoǵamdyq birlestiginiń tóraiymy Dina Erdildinova, «Atameken Business» telearnasynyń bas direktory Qanat Saharianov, áleýmettik kásipker Emin Askerov, tanymal jýrnalist, bloger Órken Kenjebek jáne media sarapshy Maksim Rojin kirdi.
Óz kezeginde, rotatsiia aiasynda Ulttyq keńes quramynan Baǵdat Mýsin, Daniiar Áshimbaev, Muhtar Taijan, Seidahmet Quttyqadam jáne Jánibek Qojyq shyǵaryldy. Áriptesterime birlesken belsendi jumys úshin alǵys aitqym keledi. Bir jyldan az ýaqyt ishinde Ulttyq keńes aiasynda eldiń ekonomikalyq, saiasi jáne áleýmettik damýy salasyndaǵy mańyzdy reformalar júzege asyryldy. Mańyzdy zańdar men normativtik quqyqtyq aktilerdiń aýqymdy paketi qabyldandy. Mamyr aiynda Ulttyq keńestiń úshinshi otyrysy ótip, onyń qorytyndysy boiynsha Prezidenttiń jańa bastamalaryn iske asyrý jónindegi jospar qabyldandy. Sondai-aq, UQSK birqatar múshesiniń usynysy boiynsha Keńes qurylymynda mádeni-rýhani damý máselelerin qarastyratyn taǵy bir top qurylady», – dep atap ótti Erlan Qarin.
