QR Prezidentiniń Keńesshisi Erlan Qarin búgin Prezidenttik jastar kadrlyq rezerviniń qatysýshylarymen kezdesti.
Júzdesý barysynda jastar Prezident Keńesshisine bolashaqta memlekettik qyzmette ainalyssaq degen jobalary týraly áńgimelep, ózderin tolǵandyrǵan saýaldardy qoidy. Jastardyń bolashaq jobalarymen, josparlarymen muqiiat tanysqan Erlan Qarin kezdesý barysynda qyzyqty áńgime órbigendigin aitty, dep habarlaidy QazAqparat.
«Búgin Prezidenttik jastar kadrlyq rezerviniń qatysýshylarymen eki saǵattan astam ýaqyt áńgimelestim. Onlain formatta ótken talqylaýǵa túrli óńirlerden 60 rezervist qatysty. Baǵdarlama qatysýshylary ózderi jáne memlekettik qyzmette ainalysqylary keletin jobalarmen tanystyrdy. Bul jobalar óte qyzyqty jáne qazirgi kezde trendke ainalǵan túrli memlekettik qyzmetterdi tsifrlandyrýdan bastap, ekologiia jáne sý qaýipsizdigi siiaqty túrli taqyryptardy qamtidy. Jas bolǵanyna qaramastan, kóbiniń bekgraýndy aitarlyqtai, 7-den 15 jylǵa deiin kásibi tájiribesi bar. Óziniń qyzyǵýshylyǵy zor, aldyǵa qoiǵan maqsatyna umtylǵan jas kásibi mamandarmen pikirlesý qashanda qyzyqty. Sondyqtan da biz bolashaqta turaqty túrde kezdesip otyramyz dep kelistik», - dep jazdy Qarin óziniń Facebook paraqshasynda.
Prezidenttik jastar kadrlyq rezerviniń qatysýshylarynyń biri Dáýlet Káribek atalǵan kezdesý jóninde bylai dep jazdy: «QR Prezidentiniń keńesshisi Erlan Karinmen onlain kezdesip, óz jobalarymyzben tanystyrdyq. Bul kezdesý jaishylyqtaǵy onlain kezdesýler siiaqty emes, árbir rezervist óz tarapynan baspananyń qoljetimdi bolýy, QQS (NDS) ár túrli bolýy (máselen, birinshi qajettilik ónimderine tómen NDS tómendetý), tsifrlandyrý, ekologiialyq qaýipsizdik, eksportty qalai damytýǵa bolady degen sekildi mańyzdy máseleler boiynshy usynys jasady. Karin Erlan aǵamyz 2 saǵattan astam bárimizdi tyńdap, aldaǵy ýaqytta jobany tiisti memlekettik organdarmen birge ortaǵa salýdy usyndy. Osyndai qiyn-qystaý kezeńde strategiialyq suraqtardy nazarda ustap, ár qaisymyzdy asyqpai tyńdaǵanyńyz úshin kóp rahmet!»,-dep jazdy.
Al Qýanysh Elikbaev: «Óte qyzyqty áńgime boldy. Prezident Keńesshisi Erlan Qarin barlyǵymyzdy muqiiat tyńdap, bizdiń suraqtarymyzǵa jaýap berdi. Memleket basshysy Qasym-Jomart Toqaevtyń Prezidenttik jastar kadrlyq rezervine erekshe nazar aýdaratyndyǵy týraly aitty. Men ózimdi qyzyqtyrǵan sala týraly áńgimelep berdim. Qyzyqty kezdesý úshin úlken rahmet!», - dedi ol.
