Qazirgi ýaqytta Prezidenttik jastar kadr rezervinen 164 adam memlekettik basqarý júiesiniń ártúrli deńgeiinde jumys istep jatyr. Bul týraly QR Prezidentiniń kómekshisi Erlan Qarin aitty, dep habarlaidy "Ult aqparat".
«Qazirgi ýaqytta Prezidenttik jastar kadr rezervinen 164 adam memlekettik basqarý júiesiniń ártúrli deńgeiinde jumys istep jatyr. Ortalyq memlekettik organdarda - 90, jergilikti organdarda - 41, ulttyq kompaniialarda jáne basqa uiymdarda - 33 rezervist bar, 12 rezervist - joǵary basshylyq laýazymdarda ózin dáleldeýge múmkindik aldy», - dep jazdy QR Prezidentiniń keńesshisi Erlan Qarin Telegram kanalynda.
Onyń aitýynsha, barlyq rezervshiler úshin olardyń kásibi sheberligi men quzyrettiligin qosymsha arttyratyn jeke damý jospary jasaldy.
«Memlekettik basqarý akademiiasynda olardy oqytyp, Prezident ákimshiliginiń, ortalyq memlekettik organdardyń basshylyǵymen kezdesýler uiymdastyrylady. Jastardyń kadr rezervin qurýdy Memleket basshysy ótken jyly sailaýaldy tuǵyrnamasynda kótergen bolatyn. Joba óziniń tiimdiligin kórsetip otyr», - deidi ol.
Onyń aitýynsha, Ulttyq qoǵamdyq senim keńesi aiasynda Prezidenttiń taǵy bir mańyzdy bastamasy – partiialyq sailaý tizimine jastarǵa 30% kvota engizý bolǵan. Osy normany engizýdiń nátijesi aldaǵy parlament pen máslihattarǵa sailaý qorytyndysynda kórinýi tiis.
Aita keteiik, Memleket basshysy Qasym-Jomart Toqaev ulyqtaý rásiminde Prezidenttik kadr rezervi qurylatynyn málimdedi. Q.Toqaevtyń Jarlyǵymen QR Prezidentiniń janyndaǵy Jastar kadr rezervi jónindegi ulttyq komissiia quryldy. 2019 jyly qyrkúiekte Prezidenttik jastar kadr rezervine ótinim qabyldai bastady.
