Prezidenttiń kómekshisi Erlan Qarin Qazaqstanda ólim jazasynyń resmi túrde alynyp tastalýyna qatysty pikir bildirdi, dep habarlaidy "Ult aqparat".
«Ulttyq keńes aiasynda kóterilgen taǵy bir bastama iske asty. Qazaqstan ólim jazasyn joiýǵa baǵyttalǵan Azamattyq jáne saiasi quqyqtar týraly halyqaralyq paktige ekinshi Fakýltativtik hattamaǵa qol qoidy. Atalmysh qujat ólim jazasyn alyp tastaýdy kózdeidi. Qazirgi ýaqytta Qazaqstanda ólim jazasyn oryndaýǵa moratorii jariialanǵan. Bul qujatqa qosylý qajettigin qazaqstandyq quqyq qorǵaýshylar men sarapshylar Ulttyq qoǵamdyq senim keńesiniń ártúrli alańynda kótergen edi», - dep jazady Prezidenttiń kómekshisi Telegram paraqshasynda.
Naqtyraq aitqanda, bul bastamany Memleket basshysynyń aldynda ótken jyldyń kúzinde belgili zańger Jemis Turmaǵambetova kótergen.
«Osynyń nátijesinde Ulttyq keńestiń 2019 jyldyń jeltoqsan aiyndaǵy otyrysynda Prezident Qasym-Jomart Toqaev QR SIM-ge Ekinshi fakýltativtik hattamaǵa qosylý protsedýrasyn bastaýdy tapsyrdy. Bul bastama saiasi reformalardyń alǵashqy paketine engizildi. Búgin Birikken Ulttar uiymynyń BUU shtab-páterinde Qazaqstannyń BUU janyndaǵy Turaqty ókili Qairat Omarov ólim jazasyn joiýǵa baǵyttalǵan Azamattyq jáne saiasi quqyqtar týraly halyqaralyq paktige ekinshi Fakýltativtik hattamaǵa qol qoidy. Bul qadam - qylmystyq zańnamany izgilendirýge baǵyttalǵan shara», - deidi Erlan Qarin.
Eske sala ketsek, 23 qyrkúiekte BUU shtab-páterinde Qazaqstannyń BUU janyndaǵy Turaqty ókili Qairat Omarov ólim jazasyn joiýǵa baǵyttalǵan Azamattyq jáne saiasi quqyqtar týraly halyqaralyq paktige ekinshi Fakýltativtik hattamaǵa qol qoiǵan bolatyn.
