Prezidenttiń keńesshisi Erlan Qarin keibir Telegram-kanaldardaǵy málimdemelerge qatysty pikir bildirdi, dep habarlaidy "Ult aqparat".
«Sońǵy kezderi keibir telegram-kanaldardaǵy jariialanymdarǵa qatysty pikir bildirýdi suraityndar jiilep ketti. Shynymen de, búginde jelide túrli telegram-kanaldar kóbeidi. Alaida olar negizinen anonimdi jáne saiasi insaidtar túrinde jalǵan aqparat taratady», - dep jazdy E. Qarin Telegram paraqshasynda.
Onyń paiymynsha, osy kanaldardyń kóbisi naqty qurylymdar men adamdarǵa qarsy aqparattyq áreketter jasaýǵa baǵyttalǵan. Osy arqyly bul jariialanymdardyń tapsyrystyq sipaty kórinip tur.
Onyń sózine qaraǵanda, feik aqparatty taratý bóliginde «Uzyn Qulaq» kanaly erekshelenýde. Kanaldyń ataýynyń ózi túrli qaýeset pen ósekke negizdelgenin sipattap tur.
«Osy áreketter aqparattyq soǵysty bastaý men adamdardy bir-birine óshiktirý arqyly jaǵdaidy turaqsyzdandyrý úshin ádeii istelip jatyr. Bilik pen qoǵamnyń nazary tolyqtai koronavirýs indetimen jáne onyń saldarymen kúresýge shoǵyrlanǵan kezde, olardyń jariialanymdarynyń dál qazir jandanǵany kezdeisoq emes», - dedi E. Qarin.
Osy oraida ol mundai resýrstardyń arandatýshylyq qadamdary uiymdastyrylǵan aqparattyq qaskúnemdik ekenin jetkizdi.
«Álemdegi jáne eldegi qazirgi ońai emes jaǵdaida kez kelgen feik-aqparat – ol da virýs ispetti, biraq ta aqparattyq virýs. Bul virýs dúrbeleń men tártipsizdik týdyrýǵa negizdelgen», - dep jazdy ol.
Osy oraida Erlan Qarin daý-damai týdyrý men jikke bólýdiń kez kelgen áreketine qatań tosqaýyl qoiylatynyn atap ótti.
«Bizdińshe, quqyq qorǵaý organdary atalǵan anonimdi kanaldyń qyzmetin tyńǵylyqty zerttep, qoldanystaǵy zańnama aiasynda tiisti sharalardy qabyldaý arqyly quqyqtyq baǵa bergeni durys», - dedi ol.
