Prezidenttiń keńesshisi Erlan Qarin Telegram paraqshasynda Májilis maquldaǵan beibit jiyndar týraly zań jobasyna qatysty pikirin bildirdi, dep habarlaidy "Ult aqparat".
«Keshe Májilis ekinshi oqylymda beibit jiyndar týraly zań jobasyn maquldady. Bul túbegeili túrde jańa zań ekenin atap ótý kerek. Qazir qoldanystaǵy zań 1995 jyly qabyldanǵan bolatyn. Beibit jiyndar týraly zań jobasyn jetildirý qajettigin 2019 jyldyń qyrkúiek aiynda Prezident Qasym-Jomart Toqaev Qazaqstan halqyna Joldaýy kezinde aitqan edi. Arada kóp ótpei Memleket basshysy Ulttyq qoǵamdyq senim keńesiniń ekinshi otyrysynda jańa zań aiasynda habarlandyrý (eskertý) qaǵidatyn engizý kerektigin málimdedi», - dep jazdy Erlan Qarin.
Prezidenttiń keńesshisi 2020 jyldyń qańtar aiynda Aqparat jáne qoǵamdyq damý ministrligi beibit jiyndar týraly jańa zań jobasyn qoǵamnyń talqylaýyna shyǵarǵanyn, osy tusta qoǵam ókilderi men sarapshylardyń, quqyq qorǵaý salasyndaǵy mamandardyń usynystary men eskertýi nazarǵa alynǵanyn jazady.
«Osydan keiin Májilis atalǵan zań jobasyn jumys barysyna qabyldady. Jumys tobyna belgili quqyq qorǵaý salasynyń mamandary, zańgerler, qoǵam qairatkerleri men Ulttyq keńes músheleri endi. Kún saiyn pikirtalas júrip jatty. Aqyrynda Májiliste atalǵan zań jobasyna aitarlyqtai ózgerister engizildi. Iaǵni árbir kezeńde zań jobasyna ózgeris engizilip, negizgi normalar men tártipter aiqyndaldy. Jańa zań jobasynyń kontseptýaldy turǵyda liberaldyq sipatqa ie ekenin atap ótý kerek. Máselen habarlandyrý ýaqyty qysqartylyp, zańmen tyiym salynbaǵan kez kelgen jerde piket uiymdastyrýǵa ruqsat berilip, qujattardyń bárine talaptar qysqartyldy. Jýrnalisterdiń jumysyn retteitin normalardyń bári alynyp tastaldy. Odan bólek talqylaý barysynda Ulttyq keńes músheleri bergen usynystar da engizildi», - deidi ol.
Erlan Qarinniń jazýynsha Prezidenttiń bastamasy boiynsha atalǵan zań jobasynda miting ótkizýde ruqsat alý qaǵidaty alynyp tastalyp, eskertý tártibi bekitilgen.
«Bul – túbegeili túrde jańa amal. Sol sebepti atalǵan zań jobasy - eldegi saiasi protsesterdi ary qarai liberalizatsiialaýda aitarlyqtai alǵa jasalǵan qadam ári ol qoǵamdyq-saiasi qarym-qatynas qaǵidattarynyń tyń qaǵidattaryn qalyptastyrady», - dep jazady Memleket basshysynyń keńesshisi.
