Aýyl ákimderin tikelei sailaý - úlken saiasi betburystardyń basy. Mundai pikirdi QR Prezidentiniń keńesshisi Erlan Qarin bildirdi, dep habarlaidy "Ult aqparat".
«Qyrkúiektiń birinshi kúni Parlamenttiń jańa sessiiasynyń ashylýynda Prezident Qasym-Jomart Kemeluly Toqaev Qazaqstan halqyna jańa Joldaýyn jariialady. Joldaý kólemdi de mazmundy bolǵany sonshalyq keibir baqylaýshylar Prezident Parlament minberinen 88 minýt boiy úzdiksiz sóz sóiledi dep eseptepti. Shyndyǵynda da, Prezident Joldaýy kólemdi qujat bolyp shyqty. Biylǵy Joldaý 11 iri taraýdan turady: ekonomika, memlekettik basqarý, áleýmettik saiasat, aimaqtardyń damýy, bilim berý, densaýlyq saqtaý, tsifrlandyrý, ekologiia, quqyq qorǵaý salasy, saiasi reforma jáne jańa qundylyqtar. Keibir sarapshylar Prezidenttiń biylǵy Joldaýynda «saiasi taqyryp az qamtyldy» dep baǵa berýde. Ókinishke orai bul sarapshylar atalǵan mańyzdy qujatty muqiiat qarap, tereń taldamaǵany kórinip tur», - dedi Erlan Karin.
Onyń atap ótýinshe, shyn mánisinde Prezident biylǵy Joldaýda bir emes birneshe taraýdy ózekti, túrli saiasi-qoǵamdyq máselelerge arnap, kóptegen jańa saiasi bastamalardy jariialady.
«Kelesi saiasi bastamalardy aitýǵa bolady: azamattarǵa reformalarǵa bastamashy bolyp, usynystar berý úshin onlain petitsiialardyń biryńǵai institýtyn qurý, jergilikti ózin-ózi basqarý tujyrymdamasyn ázirleý jáne qabyldaý, jergilikti ózin-ózi basqarý organdarynyń mártebesin kóterý, jergilikti ózin-ózi basqarýdyń qarjylyq múmkindigin nyǵaitý, máslihattardyń reviziialyq komissiiasyn kúsheitý, máslihattarǵa óńirdi damytý boiynsha petitsiiaǵa qol jinaýǵa, ázirleýge quziret berý, máslihat otyrystarynyń onlain kórsetilimin engizý, qoǵamdyq baqylaý týraly zańdy ázirleý jáne qabyldaý, kvazimemlekettik sektorda qoǵamdyq keńesterdi qurý, múliktik menshik ieleriniń birlestigi institýtyn engizý boiynsha reforma jasaý», - dedi ol.
Erlan Karin sonymen qatar biylǵy Joldaýda quqyq qorǵaý júiesin reformalaý boiynsha da jańa, tyń bastamalar usynylǵanyn aitady.
«Mysaly, Ekonomikalyq ynytymaqtastyq jáne damý uiymy elderiniń tájiribesi boiynsha qylmyspen kúres salasyn ózgertip, ókilettikterdiń ara jigin naqty ajyratatyn úsh býyndy engizý, jergilikti politsiia qyzmetin reformalaý, ýchaskelik politsiia mártebesin kóterý, politsiianyń qyzmettik ǵimarattary men túzetý mekemelerinde jappai beinebaqylaý ornatý. Sondai-aq biylǵy Joldaýda adam quqyqtary máselesine erekshe nazar aýdaryldy. Atap aitqanda, bala quqyǵyna qatysty halyqaralyq konventsiianyń fakýltativtik hattamasyna qosylý, azamattardy kiberbýllingten qorǵaý boiysha zańnamalyq sharalardy qabyldaý, halyqaralyq konventsiianyń qosymshasyna sáikes azaptaýdyń barlyq túrimen kúres boiynsha zańnamany jetildirý jáne adam saýdasyna qarsy kúres boiynsha zańnamany jetildirý», - dedi ol.
Prezident keńesshisiniń paiymynsha, eń basty saiasi reforma ol kelesi jyldan, iaǵni, 2021 jyldan bastap aýyl ákimderiniń tikelei sailanatyndyǵy bolyp otyr.
«2010 jyldan bastap aýyl ákimderi máslihattar arqyly janama 4 jylǵa sailanatyn. Sondyqtan 2017 jyly kezekti sailaý ótip, 2021 jyly, kelesi jyly aýyl ákimderiniń ókilettikteri aiaqtalatyny belgili. Soǵan bailanysty Prezident Qasym-Jomart Kemeluly Toqaev kelesi jyldan bastap ókilettigi toqtaǵan aýyl ákimderi endi tikelei sailanatyn bolady dep sheshim qabyldady. Bul bizdiń elimiz úshin óte mańyzdy saiasi reforma, úlken saiasi betburystardyń basy dep qabyldaýymyz kerek. Osylaisha, Prezidenttiń jańa bastamalaryn saiasi reformalardyń 2-toptamasy dep qabyldaýǵa bolady. Esterińizge salyp óteiin, birinshi toptama ótken jyly Ulttyq keńestiń 2-otyrysynda jariialandy. Mazmuny jaǵynan jańa toptama aýqymdy. Saiasi jańǵyrýǵa qatysty taraýdy túiindei kele Prezident saiasi salany jańǵyrtý jalǵasatynyn jáne memlekettik biliktiń barlyq derlik institýttary reformalanatyndyǵyn taǵy da basyp aitty. Al barlyq reformalardyń negizgi maqsaty - tutas memlekettiń tiimdiligin arttyrý», - dedi Erlan Qarin.
