Getty Images
Izrail men HAMAS arasyndaǵy qaqtyǵysqa bailanysty pikiri úshin frantsýz fýtbolynyń juldyzy, 2022 jylǵy «Altyn doptyń» iegeri Karim Benzemanyń basy daýǵa qaldy, dep habarlaidy Kazinform agenttigi CNN jańalyqtaryna silteme jasap.
Dúisenbide Frantsiianyń ishki ister ministri Jerald Darmanen CNews basylymyna bergen suhbatynda Benzemany Frantsiia terroristik uiym dep sanaityn «Musylman baýyrlar» dini-saiasi tobymen (QR-da tyiym salynǵan – red. eskertpesi) bailanysy bar dep aiyptady.
Telearnaǵa bergen suhbatynda Darmanen onyń ministrligi 1100 islamshyl uiymdy japqanyn aitty.
«Sońǵy aptalarda meni ásirese Benzema myrzanyń, bárimiz biletindei, «Musylman baýyrlar» qozǵalysymen bailanysy bar ekeni belgili bolǵany tańǵaldyrdy», - dedi ol.
Darmanen óz málimdemesin rastaityn eshqandai dálel keltirmedi. CNN Darmanen sózin aiǵaqtaityn túsinikteme alý úshin Frantsiianyń ishki ister ministrligine habarlasty.
"Sársenbide Frantsiia parlamentiniń senatory Valeri Býaie ministr Darmanenniń málimdemesine súienip, Karim Benzemany frantsýz azamattyǵynan aiyrýǵa shaqyrdy", dep jazdy Politico.eu.
- Ministrdiń málimdemesi ras bolsa, Karim Benzemaǵa qarsy sanktsiialardy qarastyrýymyzǵa týra keledi, - dedi konservativti Respýblikalyq partiianyń vitse-prezidenti Býaie X áleýmettik jelisinde jariialaǵan habarlamasynda.
Býaie Benzemany kásipqoi fýtbolshy alatyn eń joǵary jeke marapat «Altyn doptan» aiyrý - «alǵashqy simvoldyq sanktsiia» bolýy múmkin ekenin jáne ekinshi jaza retinde ony frantsýz azamattyǵynan aiyrýdy usyndy.
Aita keteiik, Benzema ÝEFA Chempiondar ligasyn bes ret jeńip, «Real-Madrid» fýtbol komandasy sapynda 354 gol soqty, al ótken jazda Saýd Arabiiasynyń kásibi ligasynda óner kórsetetin «Al-Ittihad» komandasyna aýysqan bolatyn.
Shabýylshy Frantsiia quramasynyń sapynda 97 oiyn ótkizip, 37 gol soqty jáne fýtbol tarihyndaǵy eń myqty frantsýz oiynshylarynyń biri retinde baǵalanyp otyr. Ol ulttyq quramadaǵy alǵashqy oiynyn 2007 jyly ótkizgen, al ótken jyly Frantsiia quramasymen qosh aitysty.
Al Darmanen bul sózin Benzema jeksenbide Izrail men HAMAS arasyndaǵy qaqtyǵysta palestinalyqtardy qoldaitynyn málimdegennen keiin aitty.
«Bizdiń bar duǵa-tilegimiz áielderdi de, balalardy da aiamai qyryp jatqan ádiletsiz jarylystardyń qurbany bolǵan Gaza halqyna arnalady», - dep jazdy Benzema X áleýmettik jelisinde.
Demonstrant toptar ótken aptada Parij kóshelerine shyǵyp, Frantsiia úkimetiniń elde Palestinany qoldaityn sherýlerge tyiym salýyna qarsy shyqty.
Darmanen qoǵamdyq tártipke alańdaýshylyq bildirip, sherýlerge tyiym salynatynyn jariialady.
«Palestinany qoldaityn sherýlerge tyiym salý kerek, óitkeni olar qoǵamdyq tártipti buzýy múmkin», - dedi ministr.
Ol, sondai-aq, politsiiany frantsýz evreileri baratyn barlyq jerlerdi, máselen sinagogalar men mektepterdi qorǵaýǵa shaqyrdy jáne frantsýz jerinde antisemitizm áreketterin jasaǵan kez kelgen sheteldiktiń «tez arada deportatsiialanatynyn» aitty.
«Musylman baýyrlar» – islam jai din emes, ómir súrý salty degen senimdi ustanatyn dini-saiasi top (QR-da tyiym salynǵan – red. eskertpesi). Ol sekýliarizmnen bas tartýdy jáne salaýatty otbasylardyń, qaýymdastyqtar men memleketterdiń negizi retinde Quran erejelerine qaita oralýdy jaqtaidy.
