Mádeniet jáne sport vitse-ministri Nurǵisa Dáýeshov Prezidenttiń Abaidyń 175 jyldyǵyn toilaý aiasynda ysyrapshyldyqqa jol bermeýge qatysty tapsyrmasy qalai oryndalatynyn aityp berdi, dep habarlaidy "Ult aqparat".
«Árine, Memleket basshysy naqty tapsyrma berip, ysyrapshyldyqqa jol bermeý kerektigin eskertti. Prezident «Abai jáne HHI ǵasyrdaǵy Qazaqstan» maqalasynda «Abaidyń toiynan da, oiynan da taǵylym alýymyz kerek» dep aitqan bolatyn. Abaidyń ózi de «beker mal shashpaqtyqty» quptamaǵan. Odan da halqymyzǵa, memleketimizge mura retinde qalarlyq dúnie jasaýymyz kerek. Memleket basshysynyń yqshamdaý jáne qarajatty bekerge shashpaý boiynsha bergen tapsyrmasyna orai naqty jumystar júrgizilip, biylǵy josparǵa ózgertýler engiziledi. Árine, ár sharanyń deńgeiine bailanysty aitylǵan tapsyrma oryndalady. Bastysy – Abai murasyn nasihattaý. Birinshi bólingen qarajattan yqshamdalady», - dedi Nurǵisa Dáýeshov.
Vitse-ministr bul rette sharalardyń sapasyna mańyz beriletinin qosyp ótti.
Eske sala ketsek, ótken aida Úkimettiń keńeitilgen otyrysynda Prezident Qasym-Jomart Toqaev Abaidyń 175 jyldyǵyna arnalǵan sharalar qandai baǵytta ótýi kerektigin túsindirip, ysyrapshyldyqqa jol bermeý kerektigin eskertken bolatyn.
«Sheteldik ártisterdi tartýdyń qajet joq. Iaǵni, demeýshilik qarjy bólingenniń ózinde, ysyrapshyldyq kerek emes. Meniń oiymsha, osy sharalardy iskerlik turǵyda ótkizýge bolady», - degen edi Prezident.
