Jambyl oblysynda aiýandyqpen óltirilgen kishkentai qyzdyń isine qatysty tyń derekter shyǵyp jatyr.
Tártip saqshylary bul isti barynsha qupiia ustaǵanymen, marqum jetkinshektiń jaqyndary bolǵan jaidy jasyrmai jaiyp saldy. Ári olar Arýaidy óltirgen qanisher eń aýyr jazaǵa kesilsin degen talap qoiyp otyr, dep habarlady KTK.
Arýaidyń jaqyndary aýyr bolsa da jantúrshigerlik qylmystyń qalai bolǵanyn baiandap berdi. Ákesi Muhit Qarajigitovtyń aitýynsha, kúdikti jetkinshekti óner mektebinen úiine alyp ketken. Onda ne bolǵany ázirge belgisiz. Nebári 45 minýttan soń óligi shyǵyp otyr. Al qaskóidiń máiit arqalaǵan júrisi sol mańdaǵy dúken kamerasyna túsip qalǵan.
"Videony kórdim, qyzym velosipedtiń artynda otyr. Sosyn 45 minýtta qapshyqty ustap artqa qarai ótken. Mekteptiń aldynan kútip alǵan. Qyzym momyn bolatyn. Kishkentai qyzymdy bilemin ǵoi. Oǵan birdeme istegen", - deidi Muhit Qarajigitov.
Kúdikti Arýaidyń ákesiniń shash aldyratyn turaqty klienti bolǵan. Jii keletin kisiniń júzi tanys bolǵasyn qarshadai qyz oǵan ilesken. Qaskóidiń aqyl esi kem degenge maqumnyń jaqyndary senbeidi. Sebebi qylmysyn saý adamdai saýatty jasyrǵan deidi.
"Onyń deni saý. Bárin oilastyrǵan. Aiǵaq eshteme qalmasyn dep órtep jibergen. Kúrteshe men sómkesin de tappai otyr", - deidi Arýaidyń anasy Lázzat Semizbaeva.
37-degi kúdikti 8 jasar qyzdyń kiim-keshegin úiinde, máiitin qalanyń shetine aparyp órtegen. Sóitip, ózi túk bolmaǵandai joǵalǵan qyzdy týystarymen birge izdepti. Al keiin ustalǵan soń qyz biikten qulap óldi dep aqtalǵan. Onyń aitýynsha, Arýai taýyq qoradan jumyrtqa alamyn dep jazym bolǵan. Biraq buǵan eshkim senbeidi.
"Sottalyp túrmeden ómir baqi shyqpasyn nemese atý jazasyn bersin. Bolmasa halyqtyń aldyna berip, qyzymdy qalai órtedi, solai órteý kerek. Ne istep qoidy meniń qyzymdy órtep tastaityndai. Sot jabyq túrde ótedi eken, men sottyń ashyq túrde ótkenin qalaimyn", -deidi qaiǵydan qan jutqan ana.
Kúdiktiniń jary bar, balasy joq. Qazir bul úidiń aýlasyna kúzet qoiylǵan. Sebebi kúdiktiniń áieline qastandyq jasalýy múmkin degen qaýip bar. Úi iesi bet-júzin kórsetýden qysyldy. Onyń aitýynsha, kúieýi 10 jyldan beri psihdispanserde tirkeýde tur. 27 jastaǵy kelinshek joldasynyń jazyqty ekenine senbeidi.
"Osyndaiǵa barýy múmkin emes dep oilaimyn. Eshteńe aitqan joq, eshteńe bildirgen joq, men ózim tańǵalyp turmyn", - deidi ol.
Buryn usaq urlyq jasaǵany úshin sottalǵan kúdikti, eki aiǵa qamaýǵa alyndy. Tártip saqshylary Arýai basyna qatty tigen soqqydan ólgen deidi. Oǵan zorlyq jasalǵan, jasalmaǵany ázirge aitylmady.
Eske salsaq, Qarataýda joǵalǵan ekinshi synyp oqýshysynyń órtelgen óli denesi tabylǵan bolatyn. Kúdikti úsh kúnnen keiin ustaldy.
