جامبىل وبلىسىندا ايۋاندىقپەن ٶلتٸرٸلگەن كٸشكەنتاي قىزدىڭ ٸسٸنە قاتىستى تىڭ دەرەكتەر شىعىپ جاتىر.
تەرتٸپ ساقشىلارى بۇل ٸستٸ بارىنشا قۇپييا ۇستاعانىمەن, مارقۇم جەتكٸنشەكتٸڭ جاقىندارى بولعان جايدى جاسىرماي جايىپ سالدى. ەرٸ ولار ارۋايدى ٶلتٸرگەن قانٸشەر ەڭ اۋىر جازاعا كەسٸلسٸن دەگەن تالاپ قويىپ وتىر, دەپ حابارلادى كتك.
ارۋايدىڭ جاقىندارى اۋىر بولسا دا جانتٷرشٸگەرلٸك قىلمىستىڭ قالاي بولعانىن بايانداپ بەردٸ. ەكەسٸ مۇحيت قاراجٸگٸتوۆتىڭ ايتۋىنشا, كٷدٸكتٸ جەتكٸنشەكتٸ ٶنەر مەكتەبٸنەن ٷيٸنە الىپ كەتكەن. وندا نە بولعانى ەزٸرگە بەلگٸسٸز. نەبەرٸ 45 مينۋتتان سوڭ ٶلٸگٸ شىعىپ وتىر. ال قاسكٶيدٸڭ مەيٸت ارقالاعان جٷرٸسٸ سول ماڭداعى دٷكەن كامەراسىنا تٷسٸپ قالعان.
"ۆيدەونى كٶردٸم, قىزىم ۆەلوسيپەدتٸڭ ارتىندا وتىر. سوسىن 45 مينۋتتا قاپشىقتى ۇستاپ ارتقا قاراي ٶتكەن. مەكتەپتٸڭ الدىنان كٷتٸپ العان. قىزىم مومىن بولاتىن. كٸشكەنتاي قىزىمدى بٸلەمٸن عوي. وعان بٸردەمە ٸستەگەن", - دەيدٸ مۇحيت قاراجٸگٸتوۆ.
كٷدٸكتٸ ارۋايدىڭ ەكەسٸنٸڭ شاش الدىراتىن تۇراقتى كليەنتٸ بولعان. جيٸ كەلەتٸن كٸسٸنٸڭ جٷزٸ تانىس بولعاسىن قارشاداي قىز وعان ٸلەسكەن. قاسكٶيدٸڭ اقىل ەسٸ كەم دەگەنگە ماقۇمنىڭ جاقىندارى سەنبەيدٸ. سەبەبٸ قىلمىسىن ساۋ ادامداي ساۋاتتى جاسىرعان دەيدٸ.
"ونىڭ دەنٸ ساۋ. بەرٸن ويلاستىرعان. ايعاق ەشتەمە قالماسىن دەپ ٶرتەپ جٸبەرگەن. كٷرتەشە مەن سٶمكەسٸن دە تاپپاي وتىر", - دەيدٸ ارۋايدىڭ اناسى لەززات سەمٸزباەۆا.
37-دەگٸ كٷدٸكتٸ 8 جاسار قىزدىڭ كيٸم-كەشەگٸن ٷيٸندە, مەيٸتٸن قالانىڭ شەتٸنە اپارىپ ٶرتەگەن. سٶيتٸپ, ٶزٸ تٷك بولماعانداي جوعالعان قىزدى تۋىستارىمەن بٸرگە ٸزدەپتٸ. ال كەيٸن ۇستالعان سوڭ قىز بيٸكتەن قۇلاپ ٶلدٸ دەپ اقتالعان. ونىڭ ايتۋىنشا, ارۋاي تاۋىق قورادان جۇمىرتقا الامىن دەپ جازىم بولعان. بٸراق بۇعان ەشكٸم سەنبەيدٸ.
"سوتتالىپ تٷرمەدەن ٶمٸر باقي شىقپاسىن نەمەسە اتۋ جازاسىن بەرسٸن. بولماسا حالىقتىڭ الدىنا بەرٸپ, قىزىمدى قالاي ٶرتەدٸ, سولاي ٶرتەۋ كەرەك. نە ٸستەپ قويدى مەنٸڭ قىزىمدى ٶرتەپ تاستايتىنداي. سوت جابىق تٷردە ٶتەدٸ ەكەن, مەن سوتتىڭ اشىق تٷردە ٶتكەنٸن قالايمىن", -دەيدٸ قايعىدان قان جۇتقان انا.
كٷدٸكتٸنٸڭ جارى بار, بالاسى جوق. قازٸر بۇل ٷيدٸڭ اۋلاسىنا كٷزەت قويىلعان. سەبەبٸ كٷدٸكتٸنٸڭ ەيەلٸنە قاستاندىق جاسالۋى مٷمكٸن دەگەن قاۋٸپ بار. ٷي يەسٸ بەت-جٷزٸن كٶرسەتۋدەن قىسىلدى. ونىڭ ايتۋىنشا, كٷيەۋٸ 10 جىلدان بەرٸ پسيحديسپانسەردە تٸركەۋدە تۇر. 27 جاستاعى كەلٸنشەك جولداسىنىڭ جازىقتى ەكەنٸنە سەنبەيدٸ.
"وسىندايعا بارۋى مٷمكٸن ەمەس دەپ ويلايمىن. ەشتەڭە ايتقان جوق, ەشتەڭە بٸلدٸرگەن جوق, مەن ٶزٸم تاڭعالىپ تۇرمىن", - دەيدٸ ول.
بۇرىن ۇساق ۇرلىق جاساعانى ٷشٸن سوتتالعان كٷدٸكتٸ, ەكٸ ايعا قاماۋعا الىندى. تەرتٸپ ساقشىلارى ارۋاي باسىنا قاتتى تيگەن سوققىدان ٶلگەن دەيدٸ. وعان زورلىق جاسالعان, جاسالماعانى ەزٸرگە ايتىلمادى.
ەسكە سالساق, قاراتاۋدا جوعالعان ەكٸنشٸ سىنىپ وقۋشىسىنىڭ ٶرتەلگەن ٶلٸ دەنەسٸ تابىلعان بولاتىن. كٷدٸكتٸ ٷش كٷننەن كەيٸن ۇستالدى.
