Úkimet otyrysynan keiin BAQ ókilderiniń suraqtaryna jaýap bergen QR Aýyl sharýashylyǵy ministri Erbol Qarashókeev kartop baǵasy byltyrǵydai qymbattamaitynyna senimdi ekenin jetkizdi, dep habarlaidy QazAqparat.
«Biz qazir kartop boiynsha qajettilikterimizdi ózimizde bar jiyntyqpen tolyqtai jaýyp otyrmyz. Sáýir aiynda ózimizde ósirilgen jas qyryqqabat sórege túsedi. Qajettilikti sonyń esebinen jabamyz. Tek kartop boiynsha jetilip úlgermei me dep qaýiptengen edik» - dedi ministr Úkimet otyrysynan keiin kýlýarda.
Erbol Qarashókeev kartop tapshylyǵynyń aldyn alý jumystary byltyrdan beri júrip jatqanyn eske saldy.
«Ózbekstannan 20 myń tonnadan kem emes jas kartopty qalypty baǵamen ákelý úshin kelissózder júrgizgenbiz. 2020-2021 jylǵy maýsymdaǵydai kartop baǵasynyń 800 teńgege deiin barýyna biyl jol bermeimiz», - dedi ol.
Vedomstvo basshysy salalyq Ulttyq joba aiasynda 2025 jylǵa qarai birneshe aýylsharýashylyq ónim túgeldei ózimizde óndiriletinin atap ótti.
«Agroónerkásip keshenin damytýdyń Ulttyq jobasyn qabyldadyq. 2025 jylǵa deiin irimshik, sút, qaimaq, et siiaqty birqatar azyq-túlik ónimin óz óniderimizben qamtamasyz etý deńgeiin 100 paiyzǵa jetkizemiz. Qant boiynsha 80 paiyz óz ónimimizben qamtamasyz etemiz», - dedi Erbol Qarashókeev.
Al Saýda jáne integratsiia ministri Baqyt Sultanov baǵany baqylaý jumystary Bas prokýratýramen birge atqarylatynyn málim etti.
«Baǵa máselelerinde, árine, daiyn ónimniń saýda ústemesi bolady. Bizde saýda ústemesiniń 15 paiyzdan aspaýy qajettigi týraly norma bar. Bul jergilikti atqarýshy organdardyń quzyretindegi másele. Tiisti jumys júrgizilýde. Búgingi tańda Bas prokýratýramen birge baǵanyń negizsiz ósýine jol bermeý úshin iri kóterme saýda naryqtaryn tekserý jumystary júrgizilýde», - dedi – dedi ministr.
