Túrkistan oblysyna jumys sapary aiasynda QR Premer-Ministri Álihan Smaiylov óńirdiń keshendi áleýmettik-ekonomikalyq damý máseleleri jóninde keńes ótkizdi, dep habarlaidy "Ult aqparat" primeminister.kz saityna silteme jasap.
Keńeste oblys ákimi Darhan Satybaldy óńirdegi aǵymdaǵy ahýal, negizgi ekonomikalyq kórsetkishter men investitsiialyq jobalardy iske asyrý barysy týraly baiandady. Sonymen qatar indýstriia jáne infraqurylymdyq damý ministri Qaiyrbek Óskenbaev, mádeniet jáne sport ministri Dáýren Abaev, birinshi energetika vitse-ministri Murat Júrebekov, aýyl sharýashylyǵy vitse-ministri Jeńis Óserbai jáne oqý-aǵartý vitse-ministri Ǵani Beisembaev baiandama jasady.
Baiandamashylardy tyńdap bolǵannan keiin Premer-Ministr biyl oblysty damytýǵa respýblikalyq biýdjette 367 mlrd teńgeden astam qarajat qarastyrylǵanyn atap ótti. Biýdjetti naqtylaý kezinde taǵy 100 mlrd teńge bólindi.
«Bul qarajat injenerlik infraqurylymdy damytýǵa, áleýmettik máselelerdi sheshýge jáne óńirdiń agroónerkásip keshenin qoldaýǵa baǵyttalǵan. Jyl sońyna deiin az ýaqyt qaldy, sondyqtan josparlanǵan nátijelerge qol jetkizý úshin biýdjet qarajatyn maqsatty jáne tiimdi paidalanýdy qamtamasyz etý qajet», — dedi Álihan Smaiylov.
Sonymen qatar Úkimet basshysy Qoja Ahmet Iasaýi kesenesiniń saqtalýyn qamtamasyz etý qajettigine nazar aýdardy. Premer-Ministr qazirgi ýaqytta kesene ainalasynda qarqyndy qurylys júrip jatqanyn, oǵan kelýshiler sany da edáýir artqanyn atap ótti. Osyǵan bailanysty ákimdik IýNESKO men basqa da halyqaralyq uiymdardyń usynymdaryn qatań saqtaýy kerek.
Ekonomikalyq máselelerge toqtalǵan Álihan Smaiylov azamattardyń ál-aýqatyn arttyrý úshin birinshi kezekte óńirdiń damýyna serpin beretin jańa investitsiialyq jobalardy iske qosý jóninde sharalar qabyldaý qajet ekenin atap ótti. Máselen, biyl oblysta 33 mlrd teńgege 29 jobany iske asyrý josparlanǵan. Budan bólek 1,9 trln teńgege taǵy 74 joba talqylanyp jatyr.
«Jańa investitsiialyq jobalardy iske asyrý arqyly jańa jumys oryndaryn ashý kerek. Oblys ákimdigi josparlanǵan jobalardyń barlyǵyn merziminde ári sapaly iske qosýdy qamtamasyz etýi qajet», — dedi Álihan Smaiylov.
Sonymen qatar Premer-Ministr azyq-túlik tapshylyǵyna jáne baǵanyń negizsiz ósýine jol bermeý úshin barlyq qolda bar naryqtyq mehanizmderdi tiimdi paidalaný, oblystyń infraqurylymy men agroónerkásip keshenin damytý boiynsha keshendi jumys júrgizý, sondai-aq «Jaily mektep» ulttyq jobasy boiynsha óńirdegi oqýshy oryndarynyń sanyn ulǵaitý jóninde sharalar qabyldaý qajettigin atap kórsetti.
«Memleket basshysynyń tapsyrmasy boiynsha sybailas jemqorlardan alynǵan qarajat endi mektepter men olarǵa qosymsha qurylystar salýǵa baǵyttalatyn bolady. Búgingi tańda respýblika boiynsha 100 mlrd teńge týraly sóz bolyp otyr. Qarajat bólý qarasha aiynda bastalady», — dedi Premer-Ministr.
Keńesti qorytyndylai kele, Memleket basshysy Qazaqstan halqyna Joldaýynda búkil eldiń áleýmettik-ekonomikalyq damýyna yqpal etetin naqty qadamdardy belgilegenin eske saldy. Olardyń ishinde jergilikti ózin-ózi basqarýdy keńeitý, paidalanylmaǵan jerlerdi qaitarý, jańa mektepter salý, aýyl meditsinasyn jańǵyrtý jáne t.b. bar.
