Qazgidromet qarasha aiyna arnalǵan aýa raiyna boljam jasady, dep habarlaidy "Ult aqparat".
Qarasha aiynyń birinshi jartysynda respýblikanyń soltústik bóliginde, shyǵysynda jáne ortalyǵynda qysqy aýa raiy boljanady.
«Qarasha aiynda jaýyn-shashyn (kóbinese qar), qarly boran, sondai-aq kóktaiǵaq pen tuman jii bolady. Aidyń birinshi jartysynyń eń sýyq kúnderinde termometr baǵanasy túnde -10-23°C, kúndiz -2-10°C deiin tómendeidi. Sýyq aýa massalary jylyǵa aýysqanda termometrlerdiń baǵanalary +5+12°S belgisine jetedi.Elimizdiń ońtústik bóliginde jaýyn-shashyn (jańbyr, jylbysqy qar) aidyń ekinshi jartysynda kútiledi, taýly jerlerde erterek bolýy múmkin. Bul jaǵdaida temperatýra fony túnde -5-12°S deiin, kúndiz -1+5°S deiin tómendeidi», - delingen sinoptikter boljamynda.
Sondai-aq, Qazgidromet mamandary eldiń soltúsindegi sýyq aýa raiy bolatynyn aitty.
«Qazaqstannyń basym bóliginde aýa temperatýrasy norma shamasynda, eldiń soltústik-batys jartysynda – normadan 1°S joǵary, ońtústik, ońtústik-shyǵys jáne shyǵystyń taýly jáne taý bókterli aýdandarynda - normadan 1°S tómen bolady dep kútilýde.
Qazaqstannyń basym bóliginde jaýyn-shashyn mólsheri norma shamasynda, elimizdiń soltústik-shyǵys jartysynda jáne ońtústik-shyǵys aimaqtarynyń taýly, taý bókterindegi aýdandarynda normadan kóp, respýblikanyń ońtústik-batys jartysynda normadan az bolady», - dedi Qazgidromet.
Qarasha aiynda qar jamylǵysy paida bolady jáne qalyptasady. Kópjyldyq málimetterge sáikes, qar jamylǵysy qalyptasýynyń ortasha kúni:
soltústik jáne shyǵys aimaqtarda - qarasha aiynyń ortasynda,
Qazaqstannyń ortalyq bóliginde - qarashanyń ekinshi jartysynda,
elimizdiń batysy men ońtústik-shyǵysynda – qarashanyń sońynda jáne jeltoqsannyń birinshi jartysynda,
respýblikanyń ońtústiginde jáne ońtústik-batysynda - jeltoqsannyń úshinshi onkúndiginde.
