QR Premer-Ministri Asqar Maminniń tóraǵalyǵymen ótken memlekettik komissiia otyrysynda QR Prezidenti Qasym-Jomart Toqaevtyń karantindik sharalardy uzartý jáne karantinnen keiingi kezeńge daiyndyq jónindegi tapsyrmasynyń oryndalý máseleleri qaraldy. Bul týraly primeminister.kz habarlady.
Elimizdegi epidemiologiialyq ahýal, halyq pen biznesti qoldaý sharalary týraly QR densaýlyq saqtaý ministri A. Tsoi, «Atameken» UKP tóraǵasy A. Myrzahmetov, QR Qarjy naryǵyn retteý jáne damytý agenttigi tóraǵasynyń orynbasary N. Ábdirahmanov, QR eńbek jáne halyqty áleýmettik qorǵaý ministri B. Nurymbetov, Almaty qalasynyń ákimi B. Saǵyntaev baiandady.
Úkimet basshysy aldaǵy eki apta ishinde óz qyzmetin ýaqytsha toqtatqan ekonomika salalarynyń qyzmetin qalpyna keltirý boiynsha júieli daiyndyq jumystaryn júrgizýdi tapsyrdy.
Ulttyq ekonomika ministrligine múddeli memlekettik organdarmen, «Atameken» UKP-men birlesip, kásipkerlerge qoldaý kórsetý sharalaryn ázirleý tapsyryldy.
Eń kóp zardap shekken salalardaǵy ShOB sýbektilerine memlekettik qoldaý sharasy retinde nesie tólemderin osy jyldyń 1 qazanyna deiingi merzimge keiinge qaldyrý múmkindigi usynylady.
Premer-Ministr biznes sýbektileriniń qyzmetine qoiylatyn sanitarlyq-epidemiologiialyq talaptardy bekitýdi, sondai-aq azamattar men kásipkerlik sýbektileriniń sanitarlyq erejelerdi saqtaýyna tiisti baqylaý jasaýdy tapsyrdy.
Kásiporynnyń jumysyna salynǵan tyiymdy alyp tastaý algoritmi kásipkerlerdi tirkeýdi jáne «Info Kazakhstan» elektrondyq platformasynda qyzmetti qaita bastaýǵa ótinimder qabyldaýdy qamtidy. Ákimdik, SEQ, óńirlik kásipkerler palatasy qyzmetkerleri men jurtshylyq ókilderinen quralǵan Komissiia teksergennen keiin biznes sýbektilerine qyzmetin qaita bastaýǵa elektrondyq ruqsat beriledi.
Tsifrlyq damý, innovatsiialar jáne aeroǵarysh ónerkásibi ministrligine koronavirýs infektsiiasynyń aldyn alý jáne aqparattandyrýdy arttyrý boiynsha mobildi qosymshalardy engizý tapsyryldy.
