Parlament Májilisiniń depýtaty Azat Perýashev elde karantindi uzartý týraly sheshimge qatysty pikir bildirdi, dep habarlaidy QazAqparat.
«Biz óz usynystarymyzdy Úkimet pen memlekettik organdarǵa jetkizgimiz keledi. Jalpy qazirgi tańda elde tótenshe jaǵdaidy engizý, karantin tártibin uzartý týraly sheshimniń ózin-ózi aqtaǵanyn kórip otyrmyz. Birneshe apta buryn ǵana álemdegi jaǵdaidan qaraǵanda bizdegi ahýal qiyn dep qorqa bastaǵan edik», - dedi Azat Perýashev «Aq jol» partiiasynyń biznesti qoldaý sharalaryna bailanysty ótkizilgen onlain rejimdegi respýblikalyq baspasóz máslihatynda.
Depýtattyń aitýynsha, búgingi tańda Eýropada, Britaniia men Belgiiada, sonymen qatar ońtústik jáne soltústik Amerikada koronavirýs indetiniń ekinshi tolqyny ótti degen pikir baryn aityp ótti.
«Sol sebepti karantindi uzartý týraly sheshimdi qoldadyq. Bul sheshim durys boldy. Prezident te osyny tapsyrǵanyn bilesizder. Iaǵni kásiporynnyń jumysyn shektep qana qoimai, ony rettep otyrý kerek. Densaýlyq saqtaý ministrliginiń esebine sensek, biz qazir indettiń sharyqtaý sheginen óttik. Aýrý juqtyrýdyń azaiyp bara jatqanyn kórip, bilip otyrmyz. Ókinishke qarai, aramyzdan indet adamdardy áli de alyp ketýde. Týystarymyzdyń, dostarymyzdyń arasynda indettiń qurbany bolǵandar bar. Alaida shyńyraý basynan jarq etken sáýle baiqalady. Desek te, arqany keńge salatyn kez emes. Prezident jappai tyiymnan góri kásiporyndardyń jumysyn retteýdi tapsyrǵan bolatyn. Alaida memlekettik organdar men jaýapty adamdardyń tarapynan bul tapsyrma basqa sipat alyp, biznes kóptegen kedergimen betpe-bet keldi. Ondai shekteýlerdiń keide negizi bolmai shyǵady», - dedi ol.
