Elordada karantin sharalaryn qadaǵalaý kúsheitilýde. Bul týraly ákimdikte ótken keńes barysynda aityldy. Talaptarǵa sáikes kelmegen shaǵyn jáne orta kásipkerlik sýbektileri jabylýy múmkin.
«Meiramhanalar, kafeler, saýda ortalyqtary jáne basqa kásipkerlik sýbektileri men ShOB sanitarlyq normalardy saqtamaǵan jaǵdaida, biz karantindi qaita engizýge májbúr bolamyz», – dep habarlady ákimdik.
Mobildi toptar saýda jáne oiyn-saýyq oryndaryna kúndelikti reidti kúsheitti. Elorda turǵyndary men qonaqtary maska taǵý tártibin qatań saqtaýy kerek.
Aita keteiik, 5 shildeden bastap karantin tártibin buzǵan elorda turǵyndary men kásipkerlerge jalpy somasy 128 665 848 teńgege 587 aiyppul salyndy.
Onyń ishinde jeke tulǵalarǵa – 12 809 358 teńge mólsherinde 267 aiyppul, kásipkerlik sýbektilerine – 115 856 490 teńge mólsherinde 320 aiyppul.
Karantindi óreskel buzýshylar negizinen tyiym salynǵanyna qaramastan óz qyzmetin júzege asyrǵan tamaqtaný oryndary, azyq-túlik dúkenderi, túngi klýbtar ieleri.
Eń óreskel buzýshylar – «Alýa» kafesi (Mustafina k-si, 38), Dorffman syra klýby, «Tekila» laýndj-bary (Jeke batyr k-si, 49), sondai-aq sulýlyq salondary men azyq-túlik dúkenderi.
Sonymen qatar 102 farmatsevtikalyq kompaniianyń qyzmetine júrgizilgen monitoring nátijeleri boiynsha tirkeýden ótpegen dári-dármekterdi satqany jáne dári-dármek baǵasynyń shekteýlerin buzǵany úshin 29 farmatsevtikalyq kompaniia jaýapkershilikke tartylyp, sotta aiyppul salyndy.
Aiyppuldyń jalpy somasy - 13 864 998 teńge.
Qazirgi ýaqytta KVI aýrýlaryn tirkeý jalǵasýda, táýligine 3-ten 20-ǵa deiin jańa jaǵdai tirkelip otyr. Naýqastar qatarynda eresektermen qatar balalar da bar.
