Almatyda quramyna aýdandyq ákimdikterdiń, jergilikti politsiia qyzmetiniń qyzmetkerleri, «Atameken» UKP ókilderi jáne Taýarlar men qyzmetterdiń sapasy men qaýipsizdigin baqylaý aýdandyq basqarmalarynyń mamandary kiretin 26 monitoringtik top 49 nysanda karantin talaptary buzylǵanyn anyqtady, dep habarlaidy "Ult aqparat".
17-18 qazan aralyǵynda 206 monitoringtik is-shara ótti.
Tekserý barysynda jumys rejimi buzylǵan 49 nysan anyqtaldy. Anyqtalǵan buzýshylyqtar boiynsha mamandarmen túsindirý jumystary júrgizildi. 44 jeke tulǵa karantin sharalaryn buzǵany úshin ákimshilik jaýapkershilikke tartyldy.
Osylaisha, Almaly aýdanynyń monitoringtik toby «Nur-El» meiramhanasynda 80 adamǵa jaiylǵan dastarhannyń ústinen tústi.
Jiynǵa kelgen qonaqtarǵa Almaty qalasynyń Bas memlekettik sanitar dárigeriniń qaýly normalary jetkizildi, sodan keiin qonaqtar mekemeden ketti. Sondai-aq, qyzmetine ýaqytsha tyiym salynǵan kompiýterlik klýb, loto klýby, «Mesto vstrechi» biliard orny jumys istep turǵany anyqtaldy.
Monitoringtik top Áýezov aýdanynda «Diadema» meiramhanasynda 100 adamǵa arnalǵan toi, «Amal» dámhanasynda 40 adamǵa arnalǵan jiyn, «Keremet»meiramhanasynda 60 adamǵa arnalǵan toidy toqtatty.
Kelýshilerge túsindirý jumystary júrgizilip, QR Ákimshilik quqyq buzýshylyq týraly Kodeksiniń 425-baby boiynsha hattamalar toltyryldy. Sonymen qatar, ýaqytsha tyiym salynǵan mekeme - «Ýho i medved» karaoke ortalyǵy jumys istep turǵany belgili boldy.
Alataý aýdanynda TJO, «Clesar Algabas» monshasy, «Baǵdat» dúkeni, «Han» dámhanasynda tártip buzýshylyqtar bolǵan.
Bostandyq aýdanynda «Ritts Karlton» qonaq úiiniń janyndaǵy meiramhanada saltanatty is-shara 45 adamǵa arnalǵan toi anyqtaldy.
Túrksib aýdanyndaǵy monitoringtik top qyzmetine ýaqytsha tyiym salynǵan nysan «Atlantis» biliard klýbyn anyqtady.
Almaty ákimdigi qala turǵyndaryna óziniń jáne ózgelerdiń densaýlyqtaryna qaýip tóndirmeýge-jappai oryndarǵa barmaýǵa jáne barlyq sanitarlyq-epidemiialyq talaptardy, maska rejimi, áleýmettik qashyqtyq qatań saqtaýǵa shaqyrady.
