Koronavirýstyń taralýyna qarsy vedomstvoaralyq komissiia álemdegi epidemiologiialyq ahýalǵa sholý jasady, dep habarlaidy "Ult aqparat".
Ulybritaniia COVID-19 taralýy boiynsha álemde tórtinshi orynǵa shyqty: munda 4 millionǵa jýyq adam indetti juqtyrǵan.
Qaitys bolǵandar sany boiynsha el besinshi orynda - 112 myńnan astam adam.
Britandyqtar Eýropadaǵy eń nashar kórsetkishke ie, el lokdaýn rejiminde ómir súrýdi jalǵastyrýda.
Dúkenderdiń kópshiligi jabyq, oqýshylar qashyqtan oqyp jatyr, meiramhanalar jáne kafeler tek ózimen alyp ketý rejiminde jumys istep tur.
Irlandiia úkimeti buryn-sońdy bolmaǵan qadam jasady, iaǵni Soltústik Irlandiia turǵyndaryna sebepsiz kirýge tyiym saldy. Erejeni buzýshylarǵa dúisenbiden bastap 100 eýro aiyppul salynady.
Irlandiia úkimeti el aýmaǵynda epidemiologiialyq qaýiptiń besinshi (eń joǵary) deńgeiin jariialady jáne pandemiia bastalǵannan berigi eń qatań karantin engizde.
Atap aitqanda, irlandiialyqtarǵa úiinen 5 shaqyrymnan astam qashyqtyqqa uzap shyǵýǵa tyiym salyndy.
Dúisenbiden bastap Frantsiia mektepteriniń oqýshylaryna qoldan jasalynǵan betperdelerdi taǵýǵa tyiym salyndy.
Budan bylai mektepke tek meditsinalyq maskalarmen kelýge ruqsat etiledi.
Sonymen qatar, Frantsiia biligi barlyq salanyń qyzmetkerlerine ashana men kafege barmai-aq jumys ornynda túski as ishýge múmkindik berý úshin eńbek zańnamasyn qaita qaraýǵa kiristi.
Avstriiada murajailar, haiýanattar baǵy men dúkender ashyla bastady, biraq bir ýaqytta kelýshiler sanyna shekteýler engizildi.
Shashtarazdar men sulýlyq salondary jumysqa qaita oraldy, biraq kelýshilerden Covid-19 synamasynyń teris nátijesi kórsetilgen anyqtama talap etiledi.
Betperde taǵý barlyq qoǵamdyq oryndarda mindetti bolyp tabylady jáne bul bir rettik meditsinalyq betperdeler emes, súzgisi bar kúrdeli dizaindaǵy maskalar bolýy kerek.
Meiramhanalar men qonaq úiler áli de jabyq.
Ońtústik Koreia astanasynda indettiń belgileri bar mysyqtar men itterdi koronavirýsqa testileý naýqany bastalǵany týraly habarlandy.
Seýl biligi úi janýarlaryna adamdarǵa qoiylǵan erejelerdiń qoldanylýy kerek dep sanaidy: úi janýarlaryn serýendetý kezinde ieleri olardyń basqa janýarlar arasyndaǵy eki metr qashyqtyqtyń saqtalýyn qadaǵalap, test oń nátijeli bolǵan jaǵdaida eki aptaǵa tolyǵymen oqshaýlanýy kerek.
