Prezidenttikke kandidat Qaraqat Ábden sailaýshylarǵa úndeý joldady, dep habarlaidy úmitker shtabynyń baspasóz qyzmeti.
«Sailaýaldy nasihat jumystarymen el óńirlerin, úlkendi-kishili qalalar men aýyldardy aralap shyqtym. Otbasy men ulttyq qundylyqtarǵa negizdelgen baǵdarlamamdy keń baitaq elimizdiń azamattaryna tanystyrdym. Jastardan izet kórdim, qariialardan bata aldym. Osylaisha, men ózimniń baǵytymnyń durys ekenine senimim tek arta tústi. «Otbasy» áldeqashan halqymyzdyń basty qundylyǵyna ainalǵan. Shańyraq, úi – babalarymyz úshin de kieli uǵym bolǵan. Maqsatym - babalardan qalǵan sol qasterli uǵymdy zamanaýi keiipke keltirip, memlekettik saiasatqa ainaldyrý», - dedi kandidat óz úndeýinde.
Budan bólek, kandidattyń ortalyq shtabynda úgit-nasihat jumystary qorytyndylandy. Qaraqat Ábdenniń sailaýaldy kezdesýleri elimizdiń megapolisterinde, oblys jáne aýdan ortalyqtarynda, monoqalalar men shalǵai aýyldarda ótti. El óńirlerindegi 20 sailaýaldy shtabtyń, kandidattyń senimdi ókilderi men 2000-ǵa jýyq volonterdiń úilesimdi jumysy barlyq áleýmettik toptardy qamtýǵa múmkindik berdi. Olardyń qatarynda: kóp balaly analar, qariialar, stýdentter, ziialy qaýym ókilderi, meditsina jáne áleýmettik qyzmetkerler, muǵalimder, mektepke deiingi bilim berý mamandary, ulttyq kiim óndirýshileri, kásipkerler, otbasylyq biznes pen týristik sala ókilderi, tigin fabrikasynyń jumyskerleri bar. Jalpy alǵanda, 1000 astam kezdesý ótkizildi.
Sailaýshylarmen kezdesý barysynda qoǵamdaǵy ózekti máseleler talqylanyp, kóp balaly otbasylardy, qart kisilerdi, erekshe qajettiligi bar jandardy, óskeleń urpaq pen jastardy qoldaý sharalary týraly sóz qozǵaldy. Kandidat otbasylyq jáne ulttyq qundylyqtardy nyǵaitýǵa erekshe kóńil bóldi.
Úgit-nasihat jumystary onlain formatta da belsendi júrgizildi. Kandidattyń resmi saitynda jariialanǵan sailaýaldy baǵdarlamany 150 myńnan astam qoldanýshy júktep aldy. Áleýmettik jelilerdegi resmi paraqshalar men saity arqyly sailaýshylardyń 40 myńǵa jýyq usynysy men saýalyn qabyldandy.
