Prezidenttikke kandidat Qaraqat Ábdenniń el óńirlerindegi sailaýaldy saparlary jalǵasyp jatyr. Búgin ol Taraz qalasynyń sailaýshylarymen kezdesti, dep habarlaidy "Ult aqparat" úmitkerdiń baspasóz qyzmetine silteme jasap.
Úide patronajdyq qyzmet kórsetýdiń ámbebap jetildirilgen modeli aiasynda kandidat patronajdyq medbikelermen birge júkti áielderdiń otbasylaryna bardy. «Januia» emhanasynyń bas medbikesi Sáýle Kaletaeva atap ótkendei, patronajdyq qyzmettiń bul modeli ana men bala densaýlyǵyn baqylaýǵa alyp, ziiandy faktorlardyń aldyn alýdy kózdeidi. Júkti jáne bosanǵan áielderdiń úilerin aralap, áleýmettik qyzmet kórsetý – óziniń nátijeliligin dáleldegen mańyzdy baǵyt. Sondai-aq kezdesý barysynda patronajdyq qyzmetkerler bul salada kásibi mamandardyń jetispeýshiligi jaily sóz qozǵady.
Qaraqat Ábdenniń pikirinshe, áleýmettik mańyzy zor patronajdyq qyzmetke qoldaý kórsetý qajet.
«Ana men bala densaýlyǵy – ult bailyǵy. Júkti áielderdiń densaýlyǵyna ziian keltiretin jaǵymsyz faktorlardy boldyrmaý kerek. Statistikaǵa súiensek, jaǵdaidyń qiyn ekendigin ańǵarýǵa bolady. Qazirgi kezde aýtizmmen aýyratyn balalardyń sany 20 ese ósken, orfandy jáne aýyr naýqasqa shaldyqqan balalar kóp. Sondyqtan bastapqy kezeńderden bastap profilaktikalyq jumys júrgizip, kúrdeli máselelerdiń aldyn alý qajet. Osy oraida patronajdyq qyzmettiń mańyzy zor, patronajdyq qyzmetkerlerdiń eńbegi suranysqa ie. Alaida bizdiń qoǵam patronajdyq medbikelerdi kútýshi nemese qaraýshy retinde qabyldaidy. Shyn máninde, patronajdyq medbike – joǵary bilikti maman jáne qoǵam men memlekettiń olarǵa degen kózqarasy da basqasha bolǵany abzal. Patronajdyq qyzmetti qoldaý úshin naqty sharalar qabyldanyp, onyń mártebesin arttyrý maqsatynda halyq arasynda aqparattyq-ideologiialyq jumys júrgizý kerek», - dedi kandidat.
Eske salsaq, elimizde 20 qarasha kúni kezekten tys prezident sailaýy ótedi. Kandidat Q.Ábden el aimaqtaryn aralap, 10 oblysta 40-dan astam kezdesý ótkizdi.
