Qaraǵandydaǵy Oktiabr aýdanyna «Alash» partiiasynyń kóshbasshysy Álihan Bókeihannyń esimi berildi, dep habarlaidy "Ult aqparat" aimaq basshysynyń baspasóz qyzmetine silteme jasap.
Qaraǵandylyqtardy kópten kútken tarihi oqiǵamen qala ákimi Ermaǵanbet Bólekbaev quttyqtady.
– Aýdandy qaita ataý – bul eń aldymen Álihan Bókeihannyń tarihi qyzmetine, jalpy elimizdiń tarihyna berilgen qurmet. Aýdannyń ataýy ǵana emes, kelbeti de ózgeredi. Sońǵy birneshe jylda úilerdiń qasbetterin, shatyrlaryn, kireberis joldary men oramishilik joldardy jóndeý boiynsha úlken jumystar júrgizildi. Maiqudyq ortalyq jolyn aýqymdy qaita qurý aiaqtaldy. Birneshe zamanaýi turǵyn úi keshenderiniń qurylysy júrip jatyr, shaǵyn aýdandarda jańa emhanalar iske qosyldy. Qaita qurý jumystarynan keiin «Liteishik» stadiony ashyldy. Alda áli talai ózgerister bar, – dedi Ermaǵanbet Bólekbaev.
Aýdan 1938 jyly qalanyń soltústik bóliginde qurylǵan. 1961 jylǵa deiin Stalin dep ataldy. Sodan keiin ol Oktiabr dep ataldy. Aýdany – 22,4 myń ga, halqy – 227 myń adam. Quramyna Maiqudyq, Prishahtinsk, Suryptaý kiredi.
– Álihan Bókeihannyń «halyqtyń pikiri men erki – Zańnyń joǵary satysy» degen jaqsy sózderi bar. Táýelsizdik kúni qarsańynda Oktiabr aýdany Qazaqstannyń birligin, onyń bolashaǵyn jaqtaǵan adam – Álihan Bókeihan atyndaǵy aýdan bolyp qaita ataldy dep maqtanyshpen aitamyz, – dep atap ótti Qaraǵandy qalalyq máslihatynyń hatshysy Qudaibergen Beksultanov.
Álihan Bókeihanov 1866 jyly 5 naýryzda Semei oblysy Qarqaraly ýeziniń Toqyraýyn bolysynyń aýylynda dúniege kelgen. Ol - memleket jáne qoǵam qairatkeri, jýrnalist jáne ǵalym, «Alash» ulttyq-demokratiialyq partiiasynyń uiymdastyrýshysy jáne kóshbasshysy, sondai-aq 1917 jyly Alash avtonomiiasynyń tóraǵasy, Qazaqstan boiynsha Ýaqytsha úkimettiń komissary boldy. Keiin ol «terroristik uiymǵa» qatysy bar degen aiyppen sottalyp, atyldy. 1989 jyly aqtaldy.
