Qaraǵandylyq zaǵip jasóspirim "Dombyra-Dastan" dombyrashylar baiqaýynda 550 qatysýshynyń arasynan úzdik dep tanylyp, bas júlde jeńip aldy. Ol baiqaýda utqan 8 million aqshasyn ata-anasyna páter alýǵa jumsamaq, - dep habarlaidy Tengrinews.kz agenttigi AstanaTV arnasyna silteme jasap.
Telearna málimetinshe, 14 jastaǵy Nurdáýlet Saǵatbektiń otbasy balalaryna mýzykalyq bilim berý úshin Temirtaýdan Qaraǵandyǵa kóship kelgen.
Jasóspirim Qaraǵandydaǵy nashar kóretinderge arnalǵan mektep-internattyń tárbielenýshisi. Ol jaryqty bir kózimen ǵana kóredi. Diagnozy - revmatoidty artrit. Ata-anasy uldaryna ota jasatý úshin úilerin satyp jibergen. Biraq otandyq nemese sheteldik klinikalar kómektese almaǵan. Dárigerler 18 jasqa tolǵanda ota jasaýǵa keńes bergen.
Dombyrashy kásibi mýzykant bolýdy armandaidy, baiqaýda qazaqsha "Arman" kúiin oryndady.
"Mýzyka arqyly qýanyshyńdy da, qaiǵyńdy da aita alasyń. Qazir páterimiz joq. Sondyqtan men segiz million teńgeni ata-anama úi alý úshin beremin. Men kompozitor bolýdy, halyq kúishisi bolýdy armandaimyn", - dedi "Dombyra-Dastan" baiqaýynyń jeńimpazy.
Elmira Japqaraeva ulymen maqtanady. Myqty ekenin, alǵa qoiǵan maqsatyna jetetinin aitady. Anasynyń sózinshe, muny "Dombyra-Dastan" baiqaýynda birinshi oryn alǵany dáleldedi.
Anasy balasynyń Óner akademiiasyna túsemin degen armanyna kedergiler kóp ekenin aityp shaǵymdandy. Sebebi Almaty men Nur-Sultandaǵy joǵary oqý oryndary men óner kolledjderi nashar kóretin adamdardy qabyldamaidy.
"Olardyń Brail shriftimen oqytatyn inkliýzivti bilimi joq. Men ministr Ashat Aimaǵambetovten joǵary oqý oryndaryna inkliýziv bilim berýdi suraimyn. Meniń balam ǵana emes, basqa balalar da bar shyǵar", - dedi Nurdáýlettiń anasy.
