Aqpan aiynyń basynda Qazaqstanǵa koronavirýqsa qarsy reseilik «Gam-Kovid-VAK» (Spýtnik V) vaktsinasynyń 20 myń dozasy, iaǵni birinshi partiiasy jetkiziledi. Bul týraly OKQ ótken baspasóz máslihatynda Densaýlyq saqtaý birinshi vitse-ministri Marat Shoranov aitty, dep habarlaidy QazAqparat.
Onyń aitýynsha, atalǵan partiiany Qazaqstan aýmaǵyna ákelý týraly Resei tarapymen tiisti kelisimder bar.
«15 aqpannan bastap Qaraǵandy farmatsevtikalyq kesheni óndirisiniń «Spýtnik V» vaktsinasy tirkeledi. Qazirdiń ózinde 90 myń doza kólemindegi birinshi partiianyń óndirisi bastaldy. Ol 26 aqpannan bastap Biryńǵai distribiýtordyń qoimalaryna jáne odan ári óńirlerge jóneltýge qoljetimdi bolady. Keiinnen shilde aiyna deiin óndiris kólemi 2 mln dozaǵa deiin jetkiziledi», - dedi birinshi vitse-ministr.
Aldyn ala málimetter boiynsha, bul vaktsinanyń tiimdiligi shamamen 92% quraidy.
Eske sala ketsek buǵan deiin Marat Shoranov vaktsinatsiia júrgizer aldynda dene temperatýrasy ólshenip, epidemiologiialyq anamnezdi jinaý, satýratsiiany, júrek jiyrylýynyń jiiligin, arteriialyq qysymdy ólsheý, tynys alý jáne júrek-qantamyr júiesin aýskýltatsiialaý jáne jutqynshaqty tekserý sharalary jasalatynyn aitqan edi. Eger temperatýra 37°C-tan assa, vaktsinatsiia keiinge qaldyrylady.
