Búgin Ulttyq ǵylym akademiiasynyń Qaraǵandy bólimshesiniń otyrysy ótti. Onda Qazaqstan Respýblikasy Ulttyq ǵylym akademiiasynyń jańa akademikteri men korrespondent-múshelerine kýálikter tapsyryldy, dep habarlaidy "Ult aqparat".
Qazaqstan Respýblikasynyń Ulttyq ǵylym akademiiasynda QR UǴA akademikteri men korrespondent-músheleriniń kezekti sailaýy ótti. Sailaýda qaraǵandylyq ǵalymdar senimdi jeńiske jetti. QR UǴA akademigi ataǵy «Ulttyq neirohirýrgiia ortalyǵy» AQ Direktorlar keńesiniń tóraǵasy, meditsina ǵylymdarynyń doktory, professor Májit Zeinollauly Shaidarovqa; Organikalyq sintez jáne kómir himiiasy institýtynyń bas ǵylymi qyzmetkeri, himiia ǵylymdarynyń doktory, professor Serik Drahmetuly Fazylovqa; «Fitohimiia» halyqaralyq ǵylymi-óndiristik holdinginiń steroidty qosylystar himiiasy zerthanasynyń meńgerýshisi, himiia ǵylymdarynyń doktory, professor Borash Igilikuly Tóleýovke berildi.
QR UǴA korrespondent-músheleri bolyp meditsina ǵylymdarynyń doktory, Qaraǵandy meditsina ýniversitetiniń professory Merýert Arstanqyzy Ǵazalieva, akademik E.A. Bóketov atyndaǵy Qaraǵandy ýniversitetiniń himiia fakýltetiniń dekany, himiia ǵylymdarynyń doktory, professor Meiram Júnisuly Búrkeev sailandy.
Ulttyq ǵylym akademiiasynyń akademikteri men korrespondent-músheleri bolyp sailaný úshin 25 bos orynǵa arnalǵan konkýrsqa qatysýǵa 125-ten astam izdenýshi qujat tapsyrǵan. Konkýrsta bir orynǵa 4-5 úmitkerge deiin básekege tústi. Kandidattardyń baiandamalary tyńdaldy, olardyń árqaisysy óziniń ǵylymi qyzmetiniń nátijelerin, júrgiziletin zertteýlerdiń ózektiligi, basymdylyǵyn, negizgi ǵylymi jetistikterin baiandady. Úmitkerler óte muqiiat irikteldi, kandidattar týraly pikirler, olardyń ǵylymǵa qosqan jeke úlesteriniń nátijeleri eskerilip, mamandandyrylǵan bólimderde jasyryn daýys berý arqyly, sodan keiin Ulttyq ǵylym akademiiasynyń Jalpy jinalysynyń sessiiasynda jasyryn daýys berý arqyly júzege asyryldy.
