Qaraǵandy oblysynda karantin kezinde toi jasaǵan sheneýnik jumystan bosatyldy. Bul týraly óńir basshysy Jeńis Qasymbek onlain rejiminde ótken apparattyq keńeste aitty, dep habarlaidy "Ult aqparat".
«Búgingi kúnnen bastap jer qatynastary basqarmasynyń basshysy Qalel Muqataiuly Maqsutov karantindi óreskel buzý, iaǵni pandemiia kezinde toi uiymdastyrýyna bailanysty qyzmetinen bosatyldy. Taǵy da eskertemin, mundai zańsyzdyqtar úshin jaza óte qatal bolady. Munda memlekettik qyzmetshiniń qyzmettik etikasynyń barlyq normalary buzylǵan» - dedi oblys ákimi.
Jeńis Qasymbek sondai-aq monitoringtik top múshelerin printsiptilikke shaqyrdy.
«Sizder bireýdiń múddesi úshin jumys isteý úshin emes, azamattardyń densaýlyǵyn qorǵaý úshin qurylǵan topsyzdar! Osyndai is-sharalardy toqtatyp, jariia etińizder. Sizder ózderińiz baqylaý kameralaryna qarai otyryp jumys isteitinderińizdi aitqan bolatynsyzdar. Sondyqtan muqiiat qarańyzdar. Salynǵan tyiym barlyǵyna birdei», - dep atap ótti oblys ákimi.
Eske salsaq, oqiǵa 7 tamyzda bolǵan. Toi bolyp jatqan meiramhanaǵa Qaraǵandy qalasynyń politsiia, sanepidbaqylaý jáne ákimdik qyzmetkerlerinen turatyn mobildi top shyqty. Mekemeniń janynda kóptegen kólikter bolǵandyqtan jáne meiramhananyń ózinde 500-ge jýyq adam bolǵandyqtan, aýmaqty qorshaý úshin politsiianyń qosymsha nariady shaqyryldy. Sondai-aq, 500 adam jinap toi ótkizgen sheneýnik qyzmetinen bosatylýy múmkin ekeni týraly da aityldy.
Aita keteiik, Qaraǵandy oblysy «qara-qyzyl» aimaqta ornalasqan. Óńirde kún saiyn Covid-19 juqtyrýdyń myńǵa jýyq jańa jaǵdaiy tirkeledi. Oblystyń bas sanitarlyq dárigeriniń qaýlysymen shekteýler kúsheitildi.
