Foto: Polisia.kz
Qaraǵandy oblysynyń politseileri asa iri kólemde esirtki tasymaldaǵan astanalyq sán salonynyń qyzmetkerin ustady, – dep habarlaidy "Ult aqparat" Polisia.kz saityna silteme jasap.
"Qaraǵandylyq esirtkige qarsy is-qimyl basqarmasynyń jáne Qaraǵandy qalasynyń patrýldik politsiia polki qyzmetkerlerimen esirtki tasymaldaýdyń aldyn alý, qylmystyń jolyn kesý maqsatynda júrgizilgen “Qarasora” arnaiy operatsiiasy barysynda kenshiler astanasynda asa iri kólemde esirtki satpaqshy bolǵan astanalyq azamatsha ustaldy. Azamatshany ustaý operatsiiasy keshkilik ýaqytta Almaty – Astana tas jolynyń Qaraǵandy qalasyna kire berisinde júrgizildi.
Kólikti toqtatý kezinde azamatsha politsiia qyzmetkerlerin, qyzmettik itti kórgennen keiin birden moiyndaý kórsetpe belgilerin berip, esirtki bar ekenin aitty. Kólikke júrgizilgen tintý jumystary kezinde eki paket sintetikalyq esirtki zaty, 3 telefon jáne 1 million teńge aqsha tárkilendi" - delingen habarlamada.
Tártip saqshylary azamatshany ustaǵannan keiin, ustaý operatsiiasy bolǵany týraly kúdiktiniń seriktesterine aqparat tarap ketpeý maqsatynda birden Astana qalasyna shyqqan. Bul jerde kúdikti azamatshanyń úiindegi as bólmesinen taǵyda 500 grammǵa jýyq mefedron esirtkisi tárkilengen.
Qaraǵandy oblystyq politsiia departamentiniń bastyǵy Sanjar Ádilovtiń aitýynsha, tárkilengen zattarǵa saraptama jasalyp, onyń sheshimine sáikes esirtkiniń - jalpy salmaǵy 2 keli 750 gramnan astam iri kólemdegi mefedron ekeni belgili boldy. Mefedron esirtkisiniń 1,5 gramyn satýdyń ózine aýyr jaza kózdelgen.
"Kúdiktige qatysty qylmystyq is qozǵaldy. Bul qylmysty jasaǵany úshin kúdiktini dúnie múlkin tárkileý arqyly 6 jyldan 12 jylǵa deiin bas bostandyǵynan aiyrý jazasy kútip tur" - deidi Ádilov.
