Qaraǵandyda "Altyn Arba" bazaryndaǵy úsh dámhana órtendi. Órt sóndirýge 52 qutqarýshy men 15 tehnika jumyldyryldy. Órt aýmaǵy 500 sharshy metr boldy, - dep habarlaidy Tengrinews.kz.
Bazarda órt shyqqany týraly habarlama órt sóndirý qyzmetine 01.03-te kelip túsken. Oqiǵa ornyna birden Qaraǵandy oblysy TJD kúshteri jiberilgen. Oqiǵa ornyna kelgen olar "Altyn Arba" bazary aýmaǵyndaǵy úsh fast-fýd nysanynda aǵash qaptama, jylytqysh, jihaz, jabdyqtar men as úi kerek-jaraqtary janyp jatqanyn anyqtaǵan.
Órttiń jalpy aýmaǵy - 500 sharshy metr.
"Qurbandar men zardap shekkender joq. Órt 01.52-de aýyzdyqtaldy. Órtti sóndirýge 52 qyzmetker men 15 tehnika jumyldyryldy. Órttiń shyǵý sebebi anyqtalyp jatyr", - dedi Qaraǵandy oblysy TJD baspasóz qyzmeti ókili.
