Qaraǵandyda uly aqyn, Abai Qunanbaevtyń eskertkishi ashyldy. Bul týraly Qaraǵandy oblysynyń ákimi Jeńis Qasymbek óziniń Facebook-tegi paraqshasynda jazdy, dep habarlaidy "Ult aqparat".
«Biyl elimiz uly Abaidyń 175 jyldyǵyn atap ótýde. Halqymyzdyń birtýar perzentiniń shyǵarmashylyǵy arqyly biz gýmanizmdi, adaldyq pen eńbekqorlyqty boiymyzǵa sińirip kelemiz. Al onyń qara sózderi arqyly rýhani qundylyqtarymyzdy qalyptastyrýdamyz.
Abaidyń shyǵarmashylyq murasyna arnalyp uiymdastyrylǵan júzdegen is-shara uly tulǵanyń darynyn jańa qyrynan tanytyp keledi,-dep jazdy ákim.
Onyń sózinshe, oblys ortalyǵynyń eń jaily jáne kórikti kósheleriniń birine Abai esimi berilgen.
«Búgin Abai qalasynda ultymyzdyń uly ustazyna arnap eskertkish ashyldy. Atalǵan sharaǵa qoǵam jáne memleket qairatkeri Saýytbek Ábdirahmanuly, abaitanýshy ǵalym Ǵarifolla Esim, aitysker aqyn Amanjol Dúisenbaiuly, «Abai akademiiasy» ǵylymi zertteý institýtynyń direktory Erlan Ernazaruly arnaiy keldi.
Jobanyń avtory Qazaqstan Sýretshiler odaǵynyń múshesi Beibit Mustafin»,-dep jazdy Jeńis Qasymbek.
Onyń sózinshe, atalǵan mádeni nysannyń ashylý saltanatyna orai aýdandyq mádeniet úiiniń alańy men qasbetin qaita qurý jáne abattandyrý jumystary júrgizildi. Sonymen qatar eskertkishtiń ashylý saltanatyna orailastyrylyp jergilikti aqyndardyń «Abai jaqqan bir sáýle...» atty shyǵarmalar jinaǵy men M.Áýezovtiń «Abai joly» roman-epopeiasynyń álemniń 18 tilindegi disktik jinaǵy shyǵaryldy. Kitaptardy tsifrlaý Shahtinsk qalasynyń ortalyq kitaphanasymen birlesip júrgizildi.
«Oblysymyzdyń barlyq turǵyndaryn osynaý mádeni nysannyń ashylýymen shyn júrekten quttyqtaimyn», - deidi oblys ákimi.
