Qaraǵandyda búgin 3 jasar balany alyp qashyp, sońynda óltirgen azamatqa qatysty istiń aldyn ala tyńdaýlary ótti, dep habarlaidy QazAqparat tilshisi.
Igentai Sopyjanovqa Qylmystyq Kodekstiń úsh baby boiynsha aiyp taǵylýda: balany urlaý, kepildikke alý jáne kisi óltirý. Bul aiyptar boiynsha ol ómir boiy bas bostandyǵynan aiyrylýy múmkin. Aita ketý kerek, osy oqiǵaǵa deiin ol qaitys bolǵan balanyń týysyn óltirgen. Alaida zań boiynsha bul jait aiypty aýyrlata almaidy. Sebebi ol kezde Sopyjanov kámeletke tolmaǵan.
Búgingi aldyn ala tyńdaýda Igentai Sopyjanovtyń qorǵaýshysy onyń isin alqabiler alqasy qaraýy týraly ótinish bildirdi.
«Bul — onyń erki. Ol ózi alqabiler kerek dep sheshti. Men oǵan barlyǵyn túsindirdim. Ol neni kózdep otyrǵany belgisiz. Birinshiden, ýaqytty sozý. Ekinshiden, meniń oiymsha, alqabiler aitarlyqtai quzyretti emes. Olar osy qylmystyq isti tergeýge obektivti qaramaýy múmkin. Biraq ol áli de úmittenedi», - dep túsindirdi advokat.
Sondai-aq, tyńdaýda aiyptalýshy tergeý kezinde oǵan kúsh kórsetilip, moraldyq qysym jasalǵanyn málimdedi. Jáne de ol atalmysh istiń materialdarymen tanysýdy talap etti.
Tergeý bólimi qyzmetkerleriniń kúsh qoldaný faktisin prokýratýra tekserýde. Qaraǵandy oblysy PD baspasóz qyzmeti buǵan deiin atalmysh jaitqa qatysty málimdeme jasaǵan bolatyn.
«Búgingi tańda probatsiia jáne Burma aýylynyń ýchaskelik politsiia inspektorynyń áreketterine quqyqtyq baǵany qozǵalǵan qylmystyq istiń aiasynda arnaiy prokýratýra qyzmetkerleri beredi», - delingen PD baspasóz qyzmetiniń resmi málimdemesinde.
Is júrgizý prokýrory Medeý Jaqanovtyń aitýynsha, Sopyjanovtyń oǵan qysym kórsetý týraly aryzy Sybailas jemqorlyqqa qarsy qyzmetke baǵyttalǵan.
Esterińizge sala keteiik, 5 qyrkúiekte Qaraǵandy oblysy Shet aýdany Burma aýylynda 23 jastaǵy er adam jas kelinshektiń qolynan 3 jasar balasyn tartyp alyp ketken. Balany izdeýge 600-den astam politsiia qyzmetkeri, onyń ishinde eriktiler tartyldy.
Úsh kúnnen keiin balanyń máiitin kent shetinen, toǵaidan taýyp alyp, kúdiktige izdeý jariialandy. 9 qyrkúiekte ol ustaldy.
