Qaraǵandynyń 47 jastaǵy turǵyny ózin Ulttyq qaýipsizdik komiteti ishki tergeý departamenti bastyǵynyń orynbasary, polkovnikpin dep tanystyryp, tártip saqshylaryn aldaǵan. Ony áshkereleýge politseiler men UQK qyzmetkerleriniń birlesken jumysy septigin tigizdi, dep habarlaidy Polisia.kz.
Bul oqiǵa 23 sáýirde tótenshe jaǵdai rejimi kezinde bolǵan. Onda er adam kóligimen kóshe kezip, ony jol erejesin buzǵany úshin politseiler toqtatqan. Ol politseilerdi UQK polkovnigimin, ishki tergeý departamenti bastyǵynyń orynbasarymyn dep aldaidy. Biraq ony rastaityn eshqandai qujat kórsetpegen.
Onyń aitqan búkil áńgimesi videoǵa túsip qalǵan. Atalǵan azamattyń áreketi kúdik týǵyzyp, mán-jaidy anyqtaý úshin politseiler UQK qyzmetkerlerin shaqyrady. Ustalǵan kúdikti Qaraǵandy qalalyq politsiia basqarmasynyń Ońtústik-Shyǵys bólimshesine jetkizildi.
Tergeý barysynda ol óziniń ótirik aitqanyn moiyndap, ókinetinin aitty. Er adam Ákimshilik quqyq buzý kodeksiniń 476-baby boiynsha aiypty dep tanyldy. Mamandandyrylǵan ákimshilik sottyń sheshimimen ol 10 táýlikke qamaýǵa alyndy.
«Polkovnigimiz» buǵan deiin de alaiaqtyǵy úshin sottalǵan. Ol óziniń laýazymy joǵary adam ekenin aityp, oblys turǵynynyń qylmystyq jaýapkershilikten jaltarýyna kómektesýge ýáde bergen» dep málim etti Qaraǵandyq oblystyq PD baspasóz qyzmeti.
