Qaraǵandy oblysynyń shahterleri Tuńǵysh Prezident - Elbasy Nursultan Nazarbaevqa úndeý joldady. Oǵan 3053 shahter qol qoiǵan, dep habarlaidy QazAqparat.
«Asa qurmetti Elbasy! Qaraǵandy oblysynyń shahterleri - qashanda Sizdiń tiregińiz. Biz árqashan tek qana Sizge senip keldik. Sizge senýge bolatynyn san márte isińizben dáleldedińiz. Siz eńbek adamyn jete túsindińiz, óitkeni ózińiz de eńbek adamysyz. Sizdiń Grezidenttik ókilettiligińizdi tapsyrý týraly sheshimińizdi estip, kóńilimiz qulazydy», - dep jazady Qaraǵandy shahterleri.
Olardyń jazýynsha, shahterler ortasynda bul jańalyqqa júregi aýyrmaǵan adam joq.
«Bizge uzaq ýaqyttan beri kórsetip kelgen qoldaýyńyz úshin alǵys aitamyz. Siz árdaiym eń qiyn sátterde bizben birge boldyńyz. Biz únemi Sizdiń qamqorlyǵyńyzdy sezinemiz. Biz árqashan Sizdiń baǵytyńyzdy qoldaimyz. Biz elimizdiń júregi - elordany Nur-Sultan dep atalǵanyn qoldaimyz. Bizdiń aýyr eńbegimizdi únemi joǵary baǵalaǵanyńyz úshin Sizge taǵy da alǵys aitqymyz keledi. Sizge myqty densaýlyq jáne amandyq tileimiz», - dep túiindeidi shahterler.
Sondai-aq, oblys metallýrgteri de Elbasy Nursultan Nazarbaevtyń eren eńbegine alǵystaryn aitty.
«Qaraǵandy oblysynyń metallýrgteri Sizdiń Prezidenttik ókilettiligińizdi toqtatý týraly sheshimińizdi úlken muńmen qabyldadyq. Bizge bul sheshimińiz ońai soqpady. Sebebi bizdiń ataqty metallýrgiialyq kombinattyń barsha tarihy, sondai-aq Temirtaý qalasynyń tarihy tikelei Sizben bailanysty. Siz sekildi metallýrgterdi basqa eshkim túsine almaidy. Álemdik deńgeidegi Kóshbasshy jolyńyzdy bizdiń kombinattan bastaǵanyńyz bizdiń esimizde. Osynda Siz domna peshiniń aldynda turyp, eńbek ettińiz. Osy jerde Sizdiń jastyq shaǵyńyz ótti», - delingen metallýrgter hatynda.
Osy oraida qaraǵandylyqtar Elbasy álemdik deńgeidegi saiasat qairatkeri atanǵan kezde de Temirtaýdy qoldaýǵa ýaqyt pen múmkindik tapqanyn atap ótti.
«Ótken jyly da bizge qoldaý jasadyńyz. Bizdiń otbasymyz úshin óte mańyzdy máselege sheshim qabyldadyńyz. Sizdiń tapsyrmańyz boiynsha osy jerdegi JEO jańǵyrtylyp jatyr, birqatar áleýmettik nysannyń qurylysy júrgizilýde. Osy oraida sheksiz alǵysymyzdy aitamyz», - deidi metallýrgter ujymy.
Sonymen qatar olar Elbasynyń prezidenttik ókilettigin toqtatý sheshimi tosyn jaǵdai bolǵanyn aitýda.
«Bizdiń kombinatqa, qalamyzǵa, elimizge, sondai-aq barsha álem úshin jasaǵan eńbegińiz úshin Sizge rizashylyǵymyzdy bildiremiz. Metallýrgter árqashan da Sizben birge ekenin bilip júrińiz! Biz barshamyz bir adamdai elordaǵa «Nur-Sultan» ataýyn berý bastamasyn qoldadyq», - dep jazdy Qaraǵandy oblysynyń metallýrgteri.
