Jeńistiń 75 jyldyǵy qarsańynda qaraǵandylyq Ekinshi dúniejúzilik soǵys ardagerleri men múgedekterine 1 mln teńgeden berildi. Odan bólek, natsistik kontslagerler tutqyndaryna, Leningrad qorshaýynda bolǵan turǵyndarǵa, tyl eńbekkerlerine, qaitys bolǵan maidangerlerdiń otbasylaryna, Aýǵanstan aýmaǵyndaǵy urys qimyldaryna qatysýshylarǵa, Chernobyl AES apatyn joiýǵa qatysýshylarǵa materialdyq kómek kórsetildi, dep habarlaidy QazAqparat oblys ákimdiginiń baspasóz qyzmetine silteme jasap.
Qaraǵandy oblysynda qazir 67 soǵys ardageri men múgedekteri tirshilik keship jatyr. Bir rettik materialdyq kómek olardyń jeke esep shottaryna aýdaryldy, sondai-aq, úilerine jetkizildi.
Odan bólek, aimaqtaǵy Ekinshi dúniejúzilik soǵys ardagerlerine teńestirilgen 101 adamǵa, iaǵni kontslagerlerdiń kámeletke tolmaǵan tutqyndaryna, qorshaýdaǵy Leningrad turǵyndary men erikti maidan eńbekkerlerine de 200 myń teńgeden bólindi.
Qoldaý soǵys jyldary qaitys bolǵan ardagerler men tyl eńbekkerleri otbasylaryna da kórsetilip, osy sanattaǵy 8778 adam 50 myń teńgeden aldy.
Aýǵanstanda soǵysqan jaýynger-internatsionalister (596 adam), ChAES apatyn joiýshylar (598 adam) da nazardan tys qalǵan joq. Olarǵa 100 myń teńgeden tólendi. Sonymen qatar, biylǵy jyldyń aqpan aiynda Aýǵanstan Demokratiialyq Respýblikasynan keńes kontingentiniń shyǵarylýynyń 31 jyldyǵy atalyp ótkende, Qaraǵandy oblysynyń birqatar qalalary men aýdandarynda atalǵan jaýyngerlik is-qimyldarǵa qatysqandarǵa 100 myń teńgeden bólindi. Bul qarajatty 902 adam aldy.
Jalpy, Jeńistiń 75 jyldyǵy qarsańynda bólingen materialdyq kómektiń jiyntyq somasy – 757,4 mln. teńge.
Qazaqstannyń ózge aimaqtary arasynda, Qaraǵandy oblysy tólemdi erte bastaǵanyn erekshe atap ótý kerek.
