Qaraǵandy oblysynda onlain saýdanyń úlesi úsh esege, iaǵni 0,8%-dan 2,4%-ǵa deiin ósýi boljanady, dep habarlaidy "Ult aqparat".
«Tsifrlyq Qazaqstan» memlekettik baǵdarlamasy aiasynda elektrondyq saýdany damytý máseleleri onlain rejiminde ótken apparattyq keńeste talqylandy.
«Resmi málimetterge sáikes, 2019 jyly oblysta bólshek saýda kólemi 8,1 mlrd teńgeni qurady. Karantin kezeńindegi jaǵdaidy eskere otyryp, kóptegen saýda úileri men qoǵamdyq tamaqtandyrý nysandary jabylýyna bailanysty jetkizý boiynsha jumysqa kóshken kezde, 2020 jyldyń qorytyndysy boiynsha bólshek taýar ainalymyndaǵy úlesti 2,4%-ǵa arttyra otyryp, elektrondyq saýdanyń keminde úsh esege ósýi kútilýde», - dedi kásipkerlik basqarmasynyń basshysy Tatiana Ablaeva.
Sondai-aq, ol 2025 jylǵa qarai elektrondy saýda úlesin 10%-ǵa jetkizý mindeti qoiylǵanyn jetkizdi.
«2019-2025 jyldarǵa arnalǵan elektrondyq saýdany damytý jónindegi jol kartasy iske asyrylýda. Qujat tutynýshylardy qorǵaý sharalaryn, biznes úshin preferentsiialardy, qoldaý infraqurylymyn qurýdy kózdeidi», - dep tolyqtyrdy ol.
Sondai-aq, azamattardy tsifrlyq saýattylyqqa úiretedi. Karantin jaǵdaiynda kýrstar qashyqtyqtan https://digitalkz.kz/kursy/ saitynda ótkiziledi.
Qaraǵandy oblysynda https://ba09.kz internet-alańy quryldy, onda onlain-dúkender men qyzmetterge siltemeler usynylǵan.
Jyl basynan beri oblysta qolma-qol aqshasyz tólemder kólemi bes esege ósti. Statistikalyq málimetter boiynsha, bes aida ol 553 mlrd teńgeni qurady.
«Elektrondy saýda kólemi ósip kele jatqanyn kórip otyrmyz. Bul jaqsy kórsetkish. Saýda kóleńkeden shyǵady. Bul úrdisti qoldaý kerek. «Atameken» palatasymen birlesip, bizneske elektrondy alańdardy igerýge kómektesý qajet. Halyqtyń sandyq saýattylyǵyn arttyrýymyz tiis», - dedi oblys ákimi Jeńis Qasymbek.
