قاراعاندى وبلىسىندا ونلاين ساۋدانىڭ ٷلەسٸ ٷش ەسەگە, ياعني 0,8%-دان 2,4%-عا دەيٸن ٶسۋٸ بولجانادى, دەپ حابارلايدى "ۇلت اقپارات".
«تسيفرلىق قازاقستان» مەملەكەتتٸك باعدارلاماسى اياسىندا ەلەكتروندىق ساۋدانى دامىتۋ مەسەلەلەرٸ ونلاين رەجيمٸندە ٶتكەن اپپاراتتىق كەڭەستە تالقىلاندى.
«رەسمي مەلٸمەتتەرگە سەيكەس, 2019 جىلى وبلىستا بٶلشەك ساۋدا كٶلەمٸ 8,1 ملرد تەڭگەنٸ قۇرادى. كارانتين كەزەڭٸندەگٸ جاعدايدى ەسكەرە وتىرىپ, كٶپتەگەن ساۋدا ٷيلەرٸ مەن قوعامدىق تاماقتاندىرۋ نىساندارى جابىلۋىنا بايلانىستى جەتكٸزۋ بويىنشا جۇمىسقا كٶشكەن كەزدە, 2020 جىلدىڭ قورىتىندىسى بويىنشا بٶلشەك تاۋار اينالىمىنداعى ٷلەستٸ 2,4%-عا ارتتىرا وتىرىپ, ەلەكتروندىق ساۋدانىڭ كەمٸندە ٷش ەسەگە ٶسۋٸ كٷتٸلۋدە», - دەدٸ كەسٸپكەرلٸك باسقارماسىنىڭ باسشىسى تاتيانا ابلاەۆا.
سونداي-اق, ول 2025 جىلعا قاراي ەلەكتروندى ساۋدا ٷلەسٸن 10%-عا جەتكٸزۋ مٸندەتٸ قويىلعانىن جەتكٸزدٸ.
«2019-2025 جىلدارعا ارنالعان ەلەكتروندىق ساۋدانى دامىتۋ جٶنٸندەگٸ جول كارتاسى ٸسكە اسىرىلۋدا. قۇجات تۇتىنۋشىلاردى قورعاۋ شارالارىن, بيزنەس ٷشٸن پرەفەرەنتسييالاردى, قولداۋ ينفراقۇرىلىمىن قۇرۋدى كٶزدەيدٸ», - دەپ تولىقتىردى ول.
سونداي-اق, ازاماتتاردى تسيفرلىق ساۋاتتىلىققا ٷيرەتەدٸ. كارانتين جاعدايىندا كۋرستار قاشىقتىقتان https://digitalkz.kz/kursy/ سايتىندا ٶتكٸزٸلەدٸ.
قاراعاندى وبلىسىندا https://ba09.kz ينتەرنەت-الاڭى قۇرىلدى, وندا ونلاين-دٷكەندەر مەن قىزمەتتەرگە سٸلتەمەلەر ۇسىنىلعان.
جىل باسىنان بەرٸ وبلىستا قولما-قول اقشاسىز تٶلەمدەر كٶلەمٸ بەس ەسەگە ٶستٸ. ستاتيستيكالىق مەلٸمەتتەر بويىنشا, بەس ايدا ول 553 ملرد تەڭگەنٸ قۇرادى.
«ەلەكتروندى ساۋدا كٶلەمٸ ٶسٸپ كەلە جاتقانىن كٶرٸپ وتىرمىز. بۇل جاقسى كٶرسەتكٸش. ساۋدا كٶلەڭكەدەن شىعادى. بۇل ٷردٸستٸ قولداۋ كەرەك. «اتامەكەن» پالاتاسىمەن بٸرلەسٸپ, بيزنەسكە ەلەكتروندى الاڭداردى يگەرۋگە كٶمەكتەسۋ قاجەت. حالىقتىڭ ساندىق ساۋاتتىلىعىن ارتتىرۋىمىز تيٸس», - دەدٸ وبلىس ەكٸمٸ جەڭٸس قاسىمبەك.
