Shymkentte esirtkini zańsyz saqtaý deregine bailanysty aýdandyq politsiia bóliminiń qyzmetkeri ishki ister organdarynan teris qylyǵy úshin jumystan shyǵaryldy, dep habarlaidy ult.kz.
Qalalyq politsiia departamentini málimetinshe, oqiǵa áleýmettik jelilerde memlekettik nómiri joq Kia kóligin qýý jáne ustaý sáti túsirilgen beinejazba taraǵannan keiin belgili boldy. Jazba avtorlarynyń málimetinshe, júrgizýshi politsiia kóligin soǵyp, oqiǵa ornynan qashýǵa tyrysqan. Sondai-aq kólik salonynda politsei bolǵany jáne avtokólikti tekserý kezinde esirtki tabylǵany aitylǵan.
Oqiǵanyń mán-jaiyn naqtylaý úshin joldanǵan saýalǵa jaýap bergen politsiia departamenti esirtkini zańsyz saqtaý deregin rastady.
Vedomstvonyń málimetinshe, uiymdasqan qylmysqa qarsy kúres basqarmasynyń qyzmetkerleri jedel is-sharalar barysynda kúmándi derekti anyqtaǵan. Avtokólikte azamattyq tulǵalarmen birge aýdandyq politsiia bólimderiniń biriniń qyzmetkeri de bolǵan.
Atalǵan politsei ishki ister organdarynan teris sebeptermen bosatyldy.
Qazir oqiǵaǵa qatysty tergeý amaldary jalǵasyp jatyr. Burynǵy qyzmetkerdiń áreketterine de quqyqtyq baǵa berilmek.
Qylmystyq-protsestik kodekstiń 201-babyna sáikes, tergeý múddesine bailanysty ózge aqparat ázirge jariia etilmeidi.
