Qaraǵandy oblysy Buqar Jyraý aýdany Tórtkól aýylynda jylqylar qyrylyp jatyr. Janýarlarda irińdi jara dermatiti paida bolyp, aýrý jylqylar kóp uzamai ólip jatyr. Belgisiz infektsiiany anyqtaý úshin synamalar alyndy, dep habarlaidy "Ult aqparat" Kazinform agenttigine silteme jasai otyryp.
Áleýmettik jelilerde mal ólimi týraly rolikter paida boldy. Beinedegi jylqy iesi janýarlardyń aiaǵyndaǵy irińdi jarany baiqaǵan. Bul jaralar jylqynyń búkil denesine tarap ketedi eken. Aýdannyń veterinarlyq inspektsiiasy taldaý úshin synama aldy. Qazirgi ýaqytta mamandar sol synamalardyń nátijesin kútip otyr.
«Tórtkól aýylyndaǵy jaǵdai boiynsha epizootiialyq limfangitke tán belgileri bar úsh jylqydan synamalar alynyp, zertteý úshin zerthanaǵa jetkizilgenin habarlaimyz. Aýrýdyń bul túrine negizinen jylqylar pen esekter shaldyqqysh keledi. Bul aýrý tek osy janýarlardyń túrlerine tán», - dedi «Qaraǵandy oblysynyń veterinariia basqarmasy» MM basshysy Qairbek Tursynbekov.
Sondai-aq, óńirdiń veterinarlyq qyzmeti epizootiialyq limfangit diagnozy rastalsa, Tórtkól aýylynda karantin rejimi engiziletinin málim etti. Belgilengen karantindik rejim sheńberinde aýrý nemese qyrylǵan janýarlar tárkilenip, joiylady. Sondai-aq, zańnama sheńberinde qoldanylatyn naryqtyq qun mólsherinde ótemaqy tólenetin bolady.
Aýrý janýarlardyń ieleri atap ótkendei, mundai infektsiia buryn kórshi aýylda rastalǵan. Osy eki aýyldyń maldary bir jaiylymda jaiylady eken. Ol kezde limfangit diagnozy rastalyp, qyrylǵan jylqylardyń ielerine ótemaqy tólengen.
