Almaty ákimi Baýyrjan Baibek halyqpen esepti kezdesýinde qalanyń ekologiialyq ahýaly týraly aitty, dep habarlaidy QazAqparat tilshisi.
«Almatyda qara tútin burynnan bolǵan. Qandai shara qolǵa alsaq ta, máseleni tolyq sheshe almaityn. Qalada jaýyn jaýǵanda aýa tazaratynyn baiqaǵan shyǵarsyzdar. Al jel bolmasa, jaýyn jaýmasa, tútin qoiýlanyp turady», - dedi qala ákimi.
Onyń aitýynsha, qala biligi avtokólik bóletin ziiandy zattarmen 70-80-jyldardan beri kúresip keledi. Ol jyldary kólikterdiń barlyǵyn gazǵa aýystyrýǵa talpynys bolǵan. Búginde halyqtyń 99 paiyzy kógildir otynǵa aýystyryldy. Áli de kómir tutynatyn úilerge biylǵy jyldyń sońyna deiin gaz tartylatyn bolady.
«Búginde qalada 2017 úi kómir paidalanady. Osydan eki jyl buryn bul kórsetkish úsh ese kóp edi. Atalǵan úilerdiń birazyna jetkizý jelileri tartyldy. Qalǵan jartysyna jyl sońyna deiin tartylady. Sondai-aq, gaz qosýdan bas tartyp otyrǵan otbasylar da bar. Tabiǵatty qorǵaý prokýratýrasyna tapsyrma berildi. Olar rezeńke, qoqys jaǵatyndardy baqylap otyrady», - dedi ákim.
