Aqordada Prezident Qasym-Jomart Toqaevtyń tóraǵalyǵymen Ǵylym jáne tehnologiialar jónindegi ulttyq keńestiń otyrysy ótip jatyr, dep habarlaidy "Ult aqparat".
Aldymen, barshańyzdy Ǵylym kúnimen shyn júrekten quttyqtaimyn! Sizder arqyly Qazaqstan ǵalymdaryna jyly lebizimdi jetkizgim keledi. Shyn máninde, búgingi merekelik kún – qoǵamymyzdaǵy erekshe sát, sebebi bul kún ǵulama ǵalym, zańǵar tulǵa Qanysh Sátbaevtyń týǵan kúnimen tuspa-tus kelip otyr. Dál búgin akademik Qanysh Sátbaevtyń týǵanyna 125 jyl toldy. Biz Uly Abaidy qazaq rýhaniiatynyń temirqazyǵy, Ahmet Baitursynulyn Ult ustazy deimiz. Al Qanysh Sátbaevty qazirgi qazaq ǵylymynyń atasy deýge bolady.
Ózderińiz bilesizder, Qanysh Imantaiuly Sátbaev – halqymyzdyń birtýar perzenti. Elimiz áli kúnge deiin onyń ǵylymi jańalyqtarynyń igiligin kórip otyr. Áigili ǵalymnyń mereitoiyn joǵary deńgeide atap ótý mańyzdy.
Meniń tapsyrmammen kóptegen is-shara ótkiziledi. Biz, bir jaǵynan, uly ǵalymǵa shynaiy qurmet kórsetemiz. Ekinshi jaǵynan, bilim-ǵylym kýltin qalyptastyrý jolynda mańyzdy qadam jasaimyz. Eń bastysy, elimiz Sátbaev salǵan sara joldy jalǵastyrýy qajet.
Biz «ǵylym» týraly sóz qozǵaǵanda, eń aldymen, uly ǵalym Qanysh Sátbaevtyń esimi oiǵa oralady. Bul – zańdylyq. Memlekettik mártebesin qaita ielengen Ulttyq ǵylym akademiiasy elimiz ǵana emes, búkil álemniń ǵylymi qaýymdastyǵy maqtan tutatyn Qanysh Sátbaevtyń esimimen tyǵyz bailanysty. Bul kezdeisoqtyq emes, - dedi Prezident.
